June 3, 2021

Dawa ki MLA ka Jaiñtia wow booh ya ka CCC, RT-PCR Center wa ka Oxygen Plant ha ka thaaiñ

Advertisement ad1

Ki 7 MLA ka Ri-loom Jaiñtia Hills ynne da yaklam yillu ki heiyatoh wa i eh i khoo wa yachem ki paidbah ka West wa East Jaiñtia Hills heiyatoh wa i wan kani ka khlam COVID-19, heiwa hadien ka yalang yong ki MLA da rai ki wow dawa na ka sorkar wow pynbiang yei emkaam ki paidbah ka thaaiñ khamtam wow yada na i bi u COVID-19.

U Lahkmen Rymbui uwa man u MLA na Amlarem wei uwa man leh u montri ki kaam pohyung ka jylla da ong u wa waroh ki 7 ngut ki MLA ka Ri-loom Jaiñtia da rai ki wow dawa na ka sorkar wow booh ya kawi ka RT-PCR Center ha ka thaaiñ khnang wow pynsuk ya ki paidbah wow yoh ya ka Report rap smat.

Advertisement ad1

Da ong u leh wa ka sorkar da thmu ko wow booh ya ka Corona Care Center (CCC) ha Shillong wa Tura, heiwa da ong u wa ka sorkar leh toh u booh ko kawi ka CCC ha Ri-loom Jaiñtia neibhah wa man ko ka thaaiñ wa da chah ktah bha ha kani ka khlam wei emkaam leh wow pynkhlan næ pynboon ya i em ki wakreh ha ki thaw sumaar ka East wa West Jaiñtia Hills.

Ha i jooh i por da ong u wa ki MLA da dawa ki leh wow pyndep noh ya ka Oxygen Plant ha Khliehriat, wei wa ki kum la’ær Oxygen leh toh u em ki ha waroh ki PHC wa CHC.

Ha iwi i liang da pyntip u leh wa ki MLA da chimkhia ki leh ya i mat wa da jooh rah da u MLA ka Mowkaiaw, u Nujorki Sungoh wow dawa booh Police Outpost ha Barato, deiwa pyntip wa kini ki mat dawa waroh daw rah ya ki hakhmat u montri rangbah ka jylla, u Conrad K Sangma.