Ka Khasi Students Union War Jaintia Circle hadien wa da yoh yutip yei chah khanglaad yong ka chnong Muktapur ha ki chipai yada pood BGB ka Bangladesh wow pynkreh ya u Side Drain yong ka madan yalehbol wa i toor pood yong ki nong Bangladesh hadooh u pood u ang yong ka chnong Muktapur kiwa da wan thung da u kba wei da kær ki tymbud.
Ynne ka sngi neiliang ka seiñ dei chrai da lai hiar ki wut wut cha katai ka thaw wei da chem sakhiat ya ini i leh yong ki nong Bangladesh. Ka seiñ khlem da pynslem da leh bait ko dei kaam wei da tympra lut ya ini i kær wei bad thang lut ya ki.
Ha ini i por neiliang ki BGB wa ki nong Bangladesh wa kamjooh ki BSF da paitke khlem da nood wow wan cha kani ka thaw.
Neiliang ka seiñ da pynsñiaw ko yei sñiawsih neibhah katkam wa pyntip kiwa yahkhmat chnong wa da dep ki wow ujor cha ka yung krehkaam ka Sub Divisional Officer Amlarem hajrong ini i jia tangwa ym em chimkhia lane leh iyi iyi hajrong ini.
Da khana leh wa neiliang ki BSF da dep khang ki yei pynkreh ya ka Scheme MGNREGA ha i por sngi wei da phah ya ki bor wow pynkreh heipor miet.
Kamtæ da kylli hakhmat yong ka sorkar iyi mut hawa ki BSF da phah pynkreh ki heipor miet wei barabor kini ki BSF da man hi-eh ki kam kiwa paitke hawa ki chipai Bangladesh da wan ki wow khanglaad yei kreh yong kiwa chong chnong ka Muktapur.
Ka seiñ da beiñ joor ko hajrong ini wei da dawa leh na ka sorkar wa toh u chimkhia hapoh chi tayaw wow pynbait ya ini wei wow pynneh ya i chongsuk chongsaaiñ ha kani ka thaw.
Neiliang ka seiñ da ong ko wa lada ka sorkar ym chimkhia ko ya ini i leh ki nong Bangladesh, daw hiar biang sa chisien cha kani ka thaw wei lada jia iyi iyi, ka sorkar hap ko wow chim yei kitkhlieh.
