Kawi ka kari Maruti Swift wa em ya u number AS-11H-1957 kawa wan na Silchar yow lai booh bru cha Guwahati da tyrrah ko ya u Home Guard, u pulit ka 4th MLP Battalion wa uwi u bru paidbah ha Khliehtyrshi heiwa u Home Guard da khlaad noh u.
Ini da jia i ynnin i miet ka 27 tarik heipor 11:15 hawa ki pulit dang leh ki yei kaam yong ki haka Weighbridge wa dang wai thymme wa em ha Khliehtyrshi, Jowai Bypass heiwa kani ka kari da wan ko wei ym em sangeh haka Check Point wa da booh da ki tin psiang wei da khang leh ya u sarok da ki Florescent Barricade yow chynna ki heipor miet wei ini i thaw man i iwa bait u sarok wei da phah pynsangeh leh ya kani ka kari hawa poi ko ha ini i thaw tangwa da lai bait ko wei da taan ko yaki le ngut chapoh dooid. Kini ki le ngut toh u Home Guard Volunteer u Luckyson Dhar (uwa khlaad) uwa na Ummulong Beat House, u Hav. R. Dkhar uwa naka 4th MLP Battalion wa u bru paidbah uwa tip kam u Danny Dkhar kiwa em kamwa 10 phut na ini thaw wa khang sarok heiwa da chah taan ki ha kani ka kari kawa yut na ini i thaw.
Ya kani ka kari da chem won yaka 2 Km na ini i thaw wa jia tangwa ym em bru de hapoh kari. I thooh ya kiwa em hapoh kari da pteiñ hadooh 7 waje ynne i step wei da yoh kem ya 3 ngut ki bru wei hawa takit da chem wa emkti uwa yah kari katwa ki arngut won ym emkti ki heini wei da pynlait noh yaki.
Ya uwa yah kari da tip kam u Samim Ahmed Mazarbhiya (40 snem) uwa na chnong Terapur, Ramnagar, Silchar, Cachar District Assam. Uwa da kam wa ym em yoo u yakni ka Check Point. Da pyntip leh wa kani ka kari toh kawa em yaka Transit Pass yow lai luti.
Ya kiwa chah tyrrah da kit wut wut cha Ialong Civil Hospital yow yoh ki yei sumaar tangwa u Luckyson Dhar da khlaad noh u chwa wow poi Hospital, u R. Dkhar won da kit cha NEIGRIHMS yow yoh u yei sumaar wa biang katwa ya u Danny Dkhar won uwa mynsoo malu mala da pynlait ya oo hadien wa yoh u yei sumaar.
Discussion about this post