Ka JSU lyngba ka Education Cell hapoh i yahkhmat u Education Secretary, u Eddy K Pohtam ynne da lai yachem ki ya ki sahep ka chnat puræ puthi hapoh ka West Jaiñtia Hills hadien wa boon ki khynnah puræ kiwa na ki manyung wa duna hei yoh i laa da ood ki ha ka seiñ neidaw wym yoh thaw puræ ki ha ki thaw yong ka sorkar kam ha Kiang Nangbah Government College, Government Boys Higher Secondary School wa ha Government Girls Higher Secondary School.
Ka seiñ da lai yachem ko leh ya ki Principal kini ki thaw puræ heiwa da chem sakhiat wa em i chitom wow pdiang lut ya waroh ki khynnah wei hajrong ini ka seiñ da pynsñiaw ko cha u Joint Director wa ka District School Education Officer wow pynsñiaw wa hadooh katni em sa kamwa 1,700 ngut tam ki khynnah ki wym pu yoh thaw puræ Class XI ha ki laiñ waphær waphær heiwa ka seiñ da dawa ko na ka sorkar wow pdiang lut ya waroh ki khynnah neibhah wa chem chitom ki wow lai cha ki thaw puræ ki bru samen.
Chooh chooh ka seiñ da e yumut ko leh ya ka sorkar wow pynman næ pynkylla noh da ka skur step wa skur miet ya ki Class XI wa Class XII khamtam ya ka Arts Stream neibhah ini daw yarap bha i ya ki khynnah kiwa angnood wow lai puræ tangwa ym yohlaad won ki.
Heijooh i por ka seiñ da kyrmen ko leh wa ka sorkar daw chimkhia ko ya ini waroh.
