Kam chibynta i lehkmen laitlooid ka ri India iwa da e pyrtuid ha uni u snem kam ka Azadi ka Amrit Mahotsav iwa man leh ka lyngkhooh dap 75 snem i yoh laitlooid, chibynta leh wa i lehkmen dap 50 snem ka jylla Meghalaya, i yoh laitlooid wa 50 snem ka ri Bangladesh wa i yatoh lok ki ar ri, da pynman ya ka yalang ha khappood ka India-Bangladesh ha Dawki-Tamabil, wei da e sñiawbha cha ka Indian High Commission da ki tiar ki tar wa ki that wa pynyoo ya ka dustur riti ka Meghalaya iwa daw booh pynyoo rong ha ka Cultural Centre, ka Indian High Commission ha Dhaka.
Ha ka yalang wa da pynman ynne ka sngi, u Assistant High Commissioner, Sylhet da e khublei u ya ka sorkar Meghalaya kiwa da e sñiawbha ya kini ki tiar ki tar wa ki that kam chibynta wow kynmoo burom ya kini ki le jiat wa da leh ynne ka sngi.
Hawa e ya i klam phang pyrdi, u F.R. Kharkongor, Commissioner & Secretary, Arts & Culture & Textiles, wa mihkhmat ya ka sorkar Meghalaya, da ban joor u yeiwa emkaam ya kini ki le jait i dap 75 snem ka India wa mar 50 snem ka Bangladesh wa ka Meghalaya wa i yatoh lok wa ka Bangladesh wei da klam u leh yeiwa da leh ka Meghalaya yow pynyoh laitlooid ya ka Bangladesh.
Da khana u leh wa ka Ministry of External Affairs (MEA) ini wa dep da kynjoh ktien ko ya ka sorkar jylla wow jied lok wa ka ri wa em parom warim wa ka Meghalaya.
Kamtæ ka sorkar jylla da jied ko ya ka Bangladesh, hawa yatoh wa U Tirot Sing, u khlawait ka jylla uwa da chah beh ha ki pharæng cha Dhaka hadien ka thma wei da yap u leh ha Bangladesh ha ka 17-07-1835.
Neiliang ka sorkar jylla da tyrwa ko ya ka MEA yow yarap chna ya ka Tirot Sing Memorial ha ka Cultural Centre, Indian High Commission, Dhaka yow kynmoo warom ya U Tirot Sing, najrong kiwi de ki kaam wa da ye u yalehlang kam chibynta ka Azadi ka Amrit Mahotsav, Golden Jubilee ka Meghalaya wa i dap 5O snem i pynlaitlooid ya ka Bangladesh wa i yatoh lok.
Kiwi de kiwa da emlang ha kani ka sngi toh u SDO (Civil) Amlarem, Joint Secretary Arts & Culture, ki BSF wa ki heh ka Customs.