Jowai: Ka National Institution for Transforming India kawa tip leh kam ka NITI Aayog kawa man ka chnat ka sorkar India kawa chong pyrkhat (Think Tank) yow pynkylla yaka ri, da tyrwa ko wow pyndooh noh ya waroh ki kari ar chaka wa pynemkaam Petrol (Combustion Engine) kiwa pynmih bor 150 cc chapoh kiwa pynemkaam da ki phniang kam i Petrol nadooh u snem 2025.
Katkam ini i tyrwa ka NITI Aayog waroh ki Company wa chna ya ki thuk thuk kiwa khlan 150 cc chapoh toh u man noh ki kiwa pynemkaam da i bordiñ (Electric Propulsion). Ini daw khang ya ki Company wa chna thuk thuk wow chna ya waroh ki kari ar chaka wa khlan bor 150 cc nadooh u Naitung (April) 2025. Tangwa ya kiwa da em chwa ya ki kari ar chaka chwa u 2025 daw chah hi ya ki wow pynemkaam ya ki. Wei i thmu toh wow pynduna yei sih ka la-ær.
Ha u snem mang poisa 2018-19, hapoh ka ri da dai hadooh 2 klur tylli ki thuk thuk hapoh ka ri katwa ki thuk thuk wa lai dei bordiñ da ye u dai 1,26,000 tylli. Hanlada wyrchaw wa ki thuk thuk wa pynemkaam Petrol, kiwa pynemkaam dei bordiñ da dai 54,800 tylli ha u snem 2017-18 kawa man kawa da ku bha manda pait ha u snem wa bood.
Ka sorkar India leh da pyrchang wow pynchlur ya ini wow pynemkaam noh da ki kari ar chaka bordiñ namo ki Electric Two-wheelers deiwa e yaka Subsidy yow duna dor ki.
Hadien ka FAME II (Faster Adoption and Manufacture of Hybrid and Electric vehicles) da pynkrehkaam yaka da mih ar tylli ki Company ka Ather Energy waka Okinawa kiwa da yoh myntoi naka Subsidy wa e da ka sorkar yow pynduna dor yaki E-Scooter wa pynmih ki.
Neiliang won ki Company kam ka Bajaj Auto, Hero MotoCorp, HMSI wa TVS da em ki ha kawi ka liang katwa ki Company (Start-ups) kam ka Revolt Intellicorp, Ather Energy, Kinetic Green Energy and Power Solutions wa Tork Motors da em ki ha kawi ka liang wow pynemkaam noh da ki thuk thuk Electric wei katwa dang smat u leh ya ini dang bha wei da kwah ki wow sdang nadooh u snem 2023.
Neiliang ka Bajaj Auto wa TVS Motor Company da ong ki wa lada khang wow pynemkaam ya ki kari ar chaka wa ki le chaka kiwa pynemkaam yaka Engine Petrol ha u snem 2025 man ko kawa ym ye u leh wei daw ktah ko ya waroh ki Company wa pynmih thuk thuk hapoh ka ri.
Neiliang ka Hero MotoCorp kawi na kiwa heh dooh kiwa pynmih thuk thuk hapoh ka ri da ong ko wow kylla noh cha ki kari Electric ha ini i por wa dang pynku kyrdan ya ki kari wow bood yaka kyrdan BS-VI hei rukom pynmih tdem ki kari daw ktah bha ko ya ki wei emkaam wow pyrkhat bha wa lada ini i tyrwa man i iwa ye u man sakhiat ha i por wa tbian.
Discussion about this post