Ka HNLC da ong ko wa hadien wa da yoh ya chiboon ki kyrpaad na kiwa da heh da san wa ki seiñ ka imlang sahlang ha kini ki sngi wa da dep, kamtæ da rai wow e laad biang yei yaklam yasuk sa chisien.
Da ong wa ynnin u snem hadien i chah siat yap u Cherish Thangkhiew da pynthut ko ya ka luti klam yasuk heiwa ya oo da pynkit wow yah ya ini i kaam chakhmat waka sorkar India.
Wei hadien wa da dep yaklam wa ki kattu katni kiwa da heh da sian, da rai wow wan chakhmat yow ya mynsjur wow yasuk waka sorkar India deilang waka sorkar Meghalaya. Wei kamwa man kattæ ka HNLC da man ko kawa da pynkhreh wow yaklam yasuk hapoh ka riti synchaar ka ri namo ka Indian Constitution khlem da booh chwa kiwon kiwon ki kyndon. Wei ini toh deiwa khlem booh de ya ka Stand Still Agreement waka Instrument of Accession kam ka kyndon chwa wow yaklam wei lada bait ka sorkar India yeini, ka HNLC da bait ko wow wan yaklam.
Heijooh i por da ong wa yieñ skem neibynta i hok ki paidbah wa neibynta i khyndaw u chyiap ka jaitbru wei kam ka seiñ da rah suloi ko neibynta ki jaitbru.
Da yooluti wa ki bru kamjooh ki seiñ daw embynta ki ha ini i yaklam yasuk wei ka sorkar toh u thung ko ya u ksiang yow pynyoo ko wa da chimkhia ya ini i kaam.
Ka HNLC da ong ko wa i thmu toh wow pynkut noh ya ka yaleh ha ini i por deiwa wanrah yei suk lada chimkhia ka sorkar hadien ki phaw snem i yaleh wei kattu chong ha i kti ka sorkar wow rah ya ini chakhmat.
