Ka South Garo Hills District Cricket Association da pynrem ko ya ka West Jaintia Hills DCA da 133 Run ha ka U-14 Girls Inter District T20 Tournament 2023 wa da pynman ha Nongstoin ynne ka sngi.
Ha kawi won ka yalehke, ka East Khasi Hills Cricket Association da jop ko ya ka West Khasi Hills DCA da 8 Wicket.
Ka WJH da jop ko ya ka kylla-khlem wei da jied ko wow kawang bol nyngkong, ka SGH da kamai ko 197/6 na ki 20 Over heiwa ka Dejiansua M Sangma da kamai boon dooh ko da 38 (Not Out), katwa ka Magdaline M Sangma won da yoh ko 37 Run. Ka Carieyoka Lyngdoh 3/44 waka Anastesia S Shullai 2/40 toh kiwa da lehbha da ka bol ya ka WJH.
Ka WJH hawa kdong ya ka thong da ye ko wow kamai du 64 Run deiwa dooh lut ya ki Wicket, heiwa ka Sawakahi Syngkon (24) samen toh kawa ye u kamai bha. Ka Shreya R Marak (2/1), ka Dejiansua (2/6) waka Awesaina S Marak (2/14) toh kiwa da lehbha da ka bol ya ka SGH.
Ha ka yalehke wa bood, ka EKH da jop ko ya ka kylla khlem heiwa da jied ki wow kawang bol chwa wei da ye ki wow ksoh ya ka WKH deiwa kamai 78/7 na ki 15 Over (hap pynduna Over). Ki Extra da em ki hadooh 44 Run wei du ka Mendy Adreena L Mawlong (10) kawa ye u kamai cha ki ar khlieh. Ka Habandarisha Shangpliang (3/10) da lehbha dooh ko da ka bol.
Ka WKH da e ko 46 tylli ki Extra heiwa ka Sharaisuk Marpna da dat ko 14 Run khlem haap waka Eliza Lyngdoh 10 (Not Out) heiwa ka EKH da kamai ko da 79/2 na ki 10.4 Over.
