Ka West Jaiñtia Hills District Cricket Association da jop ko ya ka East Jaiñtia Hills DCA da chi Innings wa 19 Run ha ka U-15 Inter District Cricket Tournament 2023 Zone 1 wa pynman ha Umbuda, Ri-Bhoi ynne ka sngi.
Ha Zone 2 won wa da pynman ha Williamnagar, ka yalehke hapyrdi ka South Garo Hills DCA wa West Khasi HIlls DCA da kut ko khlem em wa jop heiwa ka South Garo Hills da yoh Point ko neidaw wa tam ko ya ka Innings wa nyngkong.
Ynnin ka EJH da haap lut ko deiwa kamai du 20 Run ha ka Innings wa nyngkong wei ka WJH da jubab ko deiwa yoh 12/1 hadooh wa kut ka yalehke. Uwa da neh nadooh ynnin uwa da yoh leh yei naam Player of the Match, u Eshan Siangshai wa u Maremdorkini Sutnga da kamai ki 79 Run neibynta ka Wicket wa ar. U Maremdorkini da kamai u 36 wei ka WJH da dam noh ko deiwa yoh 120/6, heiwa u Eshan da kamai u 52 (Not Out). U Siyon Sangma toh uwa lehbha dooh na waroh kiwa kawang bol ka EJH deiwa yoh 4/35.
Ka EJH da emkaam ko wow kamai 100 Run yow phah Bat biang ya ka WJH tangwa da ye ki wow kamai du 81 ha ka Innings wa ar heiwa uwa Bat nyngkong u Rohit Panday da kamai u 30 Run katwa na kiwa kawang bol, u Namewanki Pakyntein da yoh u 5/18 wa u Redolent Shadap 2/10 ya ka WJH.
Ha kawi won ka yalehke, ka SGH da haap lut ko deiwa kamai 184 Run ynnin heiwa ka WKH da jubab ko deiwa kamai 140 (All Out) ynne. U Dabetbhalang Kharjana (59) wa u Andrew Starfill Rani (47) da kamai boon bait ki ya ka WKH tangwa kiwi ym ye ki wow yarap lang. U Jyeipara A Sangma (3/18) wa u Christwar S Marak (3/29) toh kiwa lehbha dooh na kiwa kawang bol.
Kamtæ ka SGH da tam ko da 44 Run wei hawa Bat haka Innings wa ar da pynkut ki yei kamai deiwa yoh 239/8 na 31 Over wei da yoh ki katni deiwa dat u Christwar 15 tylli ki 4 Run wa 10 tylli ki 6 Run yow yoh 136 Run na 96 bol. Na kiwa kawang bol da lehbha u Arwanmeki Lyngkhoi uwa da yoh 5/64.
Ka WKH da yoh ko wow Bat du 15 Over chwa wow kut noh ka yalehke heiwa da kamai ki 47/1, iwa mut wa kut ka yalehke klem em wa jop.
