Ka MLA ka NPP na Sutnga Saipung Constituency, ka Santa Mary Shylla hawa chimbynta hei yatai hajrong i klam u Lat ka jylla, da e khublei ko ya ka sorkar yeiwa da wanrah ya ka Lumshnong C&RD Block, wei da yooluti ko wa ini daw yarap ko wow wanrah ya ki kaam pynroi.
Da e khublei ko leh ya ka sorkar wa da pynlait poisa ko yow chna ya u sarok Sonapur-Borghat kawa dapoi palat T. 122 klur yow yarap ya ki chnong khappood kam ka Huroi, Lejri, Lahalein wa ka Hingaria wei ini toh da dawa ki paidbah la 50 snem wei kamjooh yei chna ya ka Border Haat ha chnong Huroi.
Da kdaw ko leh yeiwa emkaam ka Constituency yong ka kam ki sarok khamtam u NH-06 uwa kat dang lai ki sngi dang boon ki kari nadooh ki kari heh wa ki kari khian wa pynemkaam oo, kamtæ da ong ko wa emkaam wow pynheh noh oo nadooh na Mawryngkneng hadooh Malidor deiwa pynman noh oo kam u 4-Lane National Highway.
Chooh chooh da ong ko wa ha uni u sarok dei langær sahkut kari ha West wa East Jaiñtia Hills.
Heiyatoh wa u mooyong da ong ko wa nadooh wa khang ka NGT wow tih mooyong da ktah ko ya kiwa boon ki bru wa im-ja na u mooyong kiwa da dooh khih dooh khan katni wei da wanrah ko yei dooh i duk. Kamtæ da kyntu ko ya ka sorkar wow e smat ya ka License wow tih mooyong katkam ka aiñ wei wow booddien yeini i kaam waka sorkar India.
