Ka Shillong Cricket Association (B) waka North Garo Hills da jop ki ya jar jiar ki yalehke yong ki ha ka U-23 Boys Cricket Tournament wa pynman da ka Meghalaya Cricket Association ynnin ka sngi.
Ka SCA (B) da jop ko yaka East Jaiñtia Cricket Association da 7 Wicket ha Nongkhrah, Ri-Bhoi katwa ka NGH ha Mendipathar da jop ki da 55 Run yaka South Garo Hills.
Ka EJCA da kamai ko 208/10 hadien wa jop ya ka kylla khlem ha ka Group A ka Zone 1. Da kamai ki chi Run chi bol tangwa da haap ware ki Wicket ki wei da ye ki wow Bat 34.4 Over na ki 50 Over ka yalehke. U Dencil Manar da yoh u 75 na 46 bol (12×4, 3×6) da kamai lang u 112 Run neibynta ka Wicket wa ar deilang wa u Peterson Sangma (36). U Fash K Tamang da yoh u 42 Run deiwa Bat hei wa 5. Kiwa kawang bol ka SCA (B) da lehbha u Kush Agarwal uwa da yoh 6/57.
Ka SCA (B) ym em chem chitom ko wow kdong ya ka thong deiwa emkaam 28.4 Over donhi yow jop deiwa dooh 3 tylli ki Wicket. U Rohit Kumar Yadav da yoh u 68 Not Out wa u Dipankar Barua 50. U Agarwal da yoh u leh 19 Run iwa da pynman ya oo wow yoh yei naam Man-of-the-Match.
Ha ka Zone 2, ka NGH da jop ko yaka kylla khlem deiwa kamai 208/8 na ki 50 Over. U Gilseng Momin 58 wa u Aditya Singh 49 da lehbha ki da ka Bat. Ha chwa u kut, u Gunal Marak da kamai u 27 Not Out na ki 14 bol (3×4, 1×6). Na kiwa kawang bol, u Jangrik da yoh u 3/40 wa u Markush R Sangma 2/33.
Ka SGH hawa kdong da sdang ko deiwa biang heiwa u Tengchuwang Sangma (25) wa u Richard N Sangma (63) da kamai ki 67 neibynta ka Wicket wa le. Tangwa hadien wa haap u Richard heipor wa yoh 110 da haap smat kiwa Bat ka SGH kawa da kamai 153. Heiwa da ka bol, u Gilseng da yoh u 4/47 najrong ka 50 Run yow yoh u yei naam Man-of-the-Match.
Myntu ka yalehke u man ko hapyrdi ka South West Khasi Hills waka West Khasi Hills ha Group B ka Zone 1.
