Ka All Jaintia Cricket Association da jop ko ya ka Ri-Bhoi da soo Wicket ha ka U-23 Women’s Inter District Cricket Tournament ka Meghalaya Cricket Association ha Nongstoin ynne ka sngi.
Ka AJCA da jop ko ya ka kylla khlem wei da jied ko wow phah Bat chwa ya ka Ri-Bhoi kawa kamai 168/5 na ki 29 Over heiwa da ye ki wow kdong yeini ha ka 26.2 Over deiwa dooh ya 6 Wicket yow jop hapoh ka Group A ka Zone 1.
Waroh arliang da e ki boon ki Run mynkna namo ki Extra heiwa ka AJCA da e ko 91 katwa ka Ri-Bhoi 63.
Ya ka Ri-Bhoi, ka Banrisha Wahlang da kamai boon dooh ko deiwa yoh 28, katwa ka Angelica Maring da yoh ko 19 Not Out. Ka Aidashisha Shadap (2/30) waka Pyntha Lamurong (2/42) da lehbha ki ya ka AJCA da ka bol.
Hawa kdong won ya ka thong, ka Player-of-the-match, ka Kermina Challam da dat ko 5 tylli ki 4 Run yow kamai 40 na 31 bol, katwa ka Mercia Able Dhar (17), ka Ritreki Pohshna (14) waka Phaintis Lyngdoh (14) waroh da yarap ki yow pynjop ya ka AJCA. Ka Doilna Martin da yoh ko 2/22 yaka Ri-Bhoi.
Mynstep ka yalehke ha Group B ka Zone 1, ka South West Khasi Hills daw yachem ko waka West Khasi Hills. Ha ka Zone 2 ha Nongalbibra, South Garo Hills, ka North Garo Hills dawa yachem ko waka Tura District CA.
