U-23 Women’s One-Day Trophy: Rem ka Meghalaya haka Sikkim

Shillong: Ka Meghalaya da sdang ko yaka U-23 Women’s One-Day Trophy deiwa rem haka Sikkim da 61 Run ha ynne ka sngi kawa pynman ha Bhubaneshwar.

Ka Sikkim da jop ko yaka kylla khlem wei da jied ko wow Bat nyngkong wei da kamai ko 217/6 na ki 50 Over heiwa ka Meghalaya da jubab ko da 156/7.

Ka Meghalaya da pynemkaam ko ya 9 ngut kiwa kawang bol, heiwa san ngut da yoh ki mar chi Wicket- ka Soline Jaba (1/23), ka Riticia Nongbet (1/25), ka Luiza Tamang (1/28), ka Ajima Sangma (1/32) waka Deiphibapynshngain L Mawnai (1/40).

Hawa kdong Run, ka Tamang da kamai boon dooh ko da 37 Run, katwa ka Mawnai da yarap ko da 25 Run na ki 28 bol, ka Meghalaya ym ye ko wow kamai Run katkam wa emkaam wei da rem ki deiwa khlem poi thong.