U Superintending Engineer ka Jaintia Hills Distribution Circle ka MePDCL Jowai, da e jubab u yei dawa ka seiñ Pnar Student Movement heiyatoh wa ka 33/11 KV Priang Sub-Station heiwa ka seiñ da booh ko dei thoh hajrong kani ka Sub-Station wei kamjooh yei saam bordiñ cha Priang, Saphai, Khonchnong wa ka thaaiñ 13 chnong.
Da dawa leh wow pynku kyrdan ya ka Priang Sub-Station, u pynbiang ki DO Switch ha man ki chnong wei wow thung ya u Lineman.
Katkam i jubab u SE, uni u 33KV Line toh uwa da chna nadooh ki snem 1980, uwa mih na Khliehriat Sub-Station wei jrong u hadooh 37 Km uwa lai lyngba na ki khloo ki kjam. Wei i chna ya u uni ha itu i por toh yow pynpoi bordiñ heipor wa chna ya ka Khongdong Dam ka NEEPCO. Wei kani ka 33/11 KV Priang Sub-Station toh kawa pynpoi bordiñ cha ka chnong Priang, Saphai, Khonchong wa kiwi ki chnong wa em chajan. Kamtæ uni u 33KV Line hadooh katni da man u kam u thied snaam kani ka Sub-Station wei i pait i sumaar ya oo da man ko iwa khor bha tangwa da yaleh katwa ye.
Da pyntip leh wa dang pait da uwi won u 33KV Feeder Line wei uwa da pyrkhat kattæ toh yow pynyabi ya ka Mookaiaw Sub-Station cha ka Priang Sub-Station wa jrong kamwa 24 Km heiwa dadep wow leh ya ka Survey wei da pynkhreh ya ka DPR yow leh yeini.
Da pyntip wa ka Priang Sub-Station toh kawa khlem bru wa pait (Unmanned) wei da pynkhreh wow pynku kyrdan ka cha ka Control Room Operated Sub-Station wei ka DPR neibynta ini leh da pynkhreh.
Heiyatoh won wow booh ki DO Switch, da pyntip wa da phah ya u Executive Engineer ka Jowai Rural Distribution Division yow leh u yeiwa emkaam.
Neibynta won wow booh Lineman chooh, da pyntip wa yeini leh dang pynkhreh yow thung bru wei daw ye wow pyndep ym slem de.
Neiliang ka seiñ PSM da e khublei ko yeini i pynche ka MePDCL wei da chaniah wa daw leh ko yeiwa emkaam yow pynbha pynmiat yei chakri ya ki paidbah ha ka thaaiñ 13 chnong.
Discussion about this post