Kam chibynta wow thooh laad thooh luti wow yakhun thma pyrchah yei roi i drugs hapoh ka jylla, neiliang ka sorkar ynnin da chim ko ka rai wow pynboon ya ki ksaw wa ye u syu (Sniffer Dogs) yow chem yei em i drugs kamjooh wow booh ya ki kor Vehicle Scanning Machine (VSM) kiwa man kam ki kor X-Ray wa khlan ha artylli ki khyrdop wa psiah cha ka jylla, kawi ha Ri-Bhoi District wa kawi won ha East Jaiñtia Hills District.
Ka Drug Reduction Elimination and Action Mission (DREAM) ka sorkar leh da chong yachem ko ynnin deiwa khlieh da u Symbood Montri Rangbah wa pait ya ki Kaam Pohyung, u Prestone Tynsong, deiwa emlang leh u Montri ka chnat Social Welfare, u Paul Lyngdoh wa u Mission Director, u Francis G Kharshiing (Ret. IPS), najrong kiwi kiwi de ki sahep sorkar jylla.
U Paul Lyngdoh uwa man leh uwa e ktien ka sorkar MDA da ong u wa i booh ya ki Vehicle Scanning Machine ha Ri-Bhoi wa ha East Jaiñtia Hills District daw pyndep hapoh ka 6 bnai yow yoh u ksoh ya ki kari kiwa kit drugs.
Da khana u wa ka sorkar daw pynkhlan ko wow pynboon chooh chooh ki pulit ha ki Anti-Narcotics Task Force (ANTF), wei neibynta ini daw e kti ha ka Director General of Police (DGP) yow pynkhreh yeiwa emkaam wei yeiwa emkaam wa da wanrah da ka DGP daw chim rai won ha ka Cabinet Meeting.
Chooh chooh da ong wa neibynta wow pyndooh jait yei drugs da emkaam wow pynkhlan ya ki Village Defence Party (VDP) ki wow pait wei yada nei yoh i drugs u psiah wei yeini daw leh deiwa wanrah yei pynkylla ha ka Meghalaya Police Act, 2010.
“Ha Shillong em du 11 tylli ki VDP wei da emkaam chiboon chah, i da rai i wa toh u em 15 ngut hapoh kawi ka VDP, deiwa pynbiang ya ki Uniform wei wow pynku leh yeiwa su”, da ong u.
U Paul da pyntip u leh wa ka sorkar da rai ko wow pynsmat ya ki mukotduma lyngba ki Fast Track Court , wei neibynta kani, ka sorkar da yaklam ko leh wa u Chief Justice ka High Court yow pynsmat yei booh ya kini ki thaw bichaar.
“Ki Fast Track Court toh u chong ki man-ka-sngi yow bichaar ya ki mukotduma kiwa haap hapoh ka PITNDPS”, da ong u Paul.
Hawa kylli yei dawa yong ki seiñbhalang, u Montri da ong u wa ka sorkar u leh ko yei yong ka i kaamram tangwa ym leh ko iyi iyi deiwa chah pynbor.
Heiyatoh wa ki thaw sumaar, u Paul Lyngdoh da ong u wa ka sorkar kamwa da kyrchaan wow krehlang wa ki chnong, ki balang kamjooh wa ki seiñ kreh monsñiawbha, smat ka sorkar wow yarap neibynta ki thaw sumaar deiwa em kiwa e thaw.
Discussion about this post