Ka Alin Sherin Abraham kawa dang 10 bnai kawa da mynsoo hadien wa chah tyrrah ka kari wa chong ko deilang ka bei ko ha ka 5 tarik uni u bnai ha Pallam Borma Junction ka jylla Kerala heiwa ka bei ko deilang u papun wa ka beipun ko leh da mynsoo ki.
Wei manda sumaar ya ka da pynbna ki Doctor wa da yap i jabieñ ko ha ka 13 tarik wei ym ye de u leh iyi iyi, kamtæ neiliang ka bei wa u pa ko da rai ki wow e sñiawbha ya u Liver, ki ar tylli ki Kidney, ki pyllung khmat wa u Heart Valve ko cha kiwi won ki khynnah kiwa emkaam yarap heiwa deiwa leh yeini da pynim ko ya 5 ngut kiwi ki khynnah kiwa chitom.
Ya u Liver ko daw e cha i khonboo wa dang 6 bnai, ya ki Kidney daw e cha iwi won i khynnah kamjooh ki pyllung khmat wa u Heart Valve u lai ki cha kiwi.
Ka Alin da man ko leh kam kawa khian rta dooh wow man kam ka Organ Doner ka jylla Kerala.
Heiyatoh wa ini neiliang ka sorkar Kerala da pynbna ko wa ya ka Alin Sherin Abraham u pyndep ya ka lehniam ko da ka Police Honours deiwa e leh ya ka Bugle Salute wei da phah leh ya u District Collector wow pynbiang u ki syntu neibynta u Chief Minister wa ka sorkar Kerala.
Ya ka niam ka rukom u pyndep ha kani ka 15 tarik heipor 3:00 waje i sngi ha St. Thomas CSI Church, Nedungadappally.
Heipor wa kit yei metyap ko na Amrita Hospital, Ernakulam, neiliang ki Security da e ki ya ka Salute.
Discussion about this post