Ki chipai ka ri India waka USA daw ya krehlang ki 15 sngi kam chibynta ka Military Exercise ha Alaska, USA ka wow sdang nadooh kani ka sngi Thohdieñ kam chibynta i yatoh lok ki ar ri.
Kani toh ka sien wa 17 wa pynman ya kani ka “Yudh Abhyas” heiwa ha kani ka kynti daw pynman ha Joint Base Elmendorf Richardson, Alaska nadooh ka 15 tarik hadooh ka 29 tarik uni u bnai.
Neiliang ka India daw em 350 ngut ki chipai heiwa iwa khaddooh wa pynman ya kani ka Yudh Abhyas da pynman ha ka Mahajan Field Firing Ranges ha Bikaner ha u Thohlakhmi.
Neiliang ki heh ka Indian Army da ong wa ini da man ko leh sa kam uwi u moomær i ya krehlang ki chipai ki ar ri. Wei lyngba ini daw wanrah ko yei ya sñiawthooh yumut, i yakrehlang wei iwa ye u ya krehlang hapyrdi kini ki chipai ka ar ri.
Iwa da leh ha kini ki 15 sngi toh i rukom yaleh thma ha ki thaw wa dait thah wei wa em ka yor yow ya e buit lang yeiwa da tip chwa.
I ya krehlang ki chipai ka India wa ki yong ka US toh iwa da ku bha ha kini ki snem wa da lai heiwa ka US ha u 2016 da ong ko wa ka India da man ko ka lok wa emkaam heiyatoh wa i yada ri.
Ki ar ri leh da dep ki wow yasoi soskular ha u 2016 deiwa soi ya ka Logistics Exchange Memorandum of Agreement (LEMOA) deiwa chah ya ki ar ri wow pynemkaam lang ya ki Military Base hei wow chna ya iwa sih, yow thap phñiang wa kiwi kiwi de wa emkaam.
Ki ar ri da dep soi ki leh ya ka COMCASA (Communications Compatibility and Security Agreement) ha u 2018 yow thied tiar yaleh thma ka India na US.
Ha u Naichiphaw ynnin u snem, ka India wa ka US da soi ki ya ka soskular BECA (Basic Exchange and Cooperation Agreement).
