Ka chnat Arts & Culture ka sorkar Meghalaya da pynbna ko da ka Chief Minister’s Research Grant (CMRG), 2024 neibynta kitu kiwa kwah wow leh yei thooh bniah yow sñiawthooh ya iwa boon i eh i chitom yow wai ki laad ki luti wa thymme yow pynbait yeiwa thut haka imlang sahlang, heijooh i por leh yow tyrwa ki buit kammon u leh yow pynkylla thymme.
Kani ka Research Grant man ko leh kam chibynta wow pynchlur ya kitu kiwa chemphang wow thooh bniah khamtam kiwa yatoh waka dustur riti, i ktien u thylliej, ki parom yongrim, i mantre ya u chyiap i khyndaw, i rukom kheiñkur, i hiar pateiñ ki jaitbru ka Meghalaya.
Kiwa ye u yaleh ya kani ka CMRG toh u man ki kiwa da pyndep yaka Bachelor Degree ha ki laiñ Social Science na kawon kawon ka thaw puræ wa da tipmit da ka UGC nadooh ki Central næ ka State University ka Meghalaya.
Yow yaleh ya kani ka Research Grant daw khut da ka Advertisement ha ki Website ka sorkar Meghalaya, ha ka chnat Arts & Culture, lyngba ki Social Media Account ka Department/Directorate ka Arts & Culture.
I por wow pyndep ya kani ka Research toh 10 bnai, wei daw e Rs. 3 lak ya uwi pa uwi na kiwa chah jied yow leh yeini.
Daw e chwa nyngkong 50% yow sdang ya ini i kaam, daw e sa 25% manda kut ka 7 bnai hadien wa ye u pynsakhiat hadooh katwon da lai i kaam chakhmat wei kawa khadooh ka 25% daw e manda ye u pyndep ya waroh i jait.
Discussion about this post