Ka Joint Action Committee yong ka seiñ ki tre trok, kiwa yah trok, wa kynthup yaka Jaiñtia Hills Truck Owner Association, ka Commercial Truck Owner and Driver Association, ka All Cement Clinker Transportation wa na Khasi wa Jaiñtia ynnin ka sngi da pynbna paidbah ki wow pynman dei yakhih wa khlem booh por neibynta wow khang luti ya ki truck kit khyndaw-bilat kit clinker na Lumchnong cha Assam i wow sdang ha ka 22 tarik uni u bnai na Tuber Takhñiang, East Jaiñtia Hills District.
U Biangshwa Shylla u Chairman ka JAC hawa klam da khana u i daw wa chim ya kani ka rai toh wa chem chitom saja ki neipor cheipor hei yatoh wa i dor i mur bai kit næ bai kari.
Wei wot hawa da dep phah ki dei thoh cha waroh ki karkhana khyndaw-bilat leh ym em yoh ki iyi yi leh i jubab, najrong wa dadep phah leh ki ka chithi pynkynmoo.
I kwah yong ki hi kam ki tre truck, kiwa yah truck toh wow yoh yaka bai kit wa Rs. 1500 chi ton, neibhah kamwa man kattæ ki karkhana su ki katwa ngait hi-eh ka bai kari.
Kamtæ da khut ki i yakrehlang yong waroh ki tre truck, kiwa yah trok khnang wa i angnood u man iwa jop.
U Peter Marbaniang u General Secretary ka Meghalaya Commercial Truck Owner and Driver Association, u Balen Thurbru President ka All Jaiñtia Cement and Clinker Transporter’s Association won khana ki wa nachwa ka bai kari wa toh hapoh Meghalaya da mynjur dei dor sorkar, kamtæ hadien wa mynjur dei dor sorkar kini ki karkhana da pynkylla noh ki cha Assam ya waroh ki kudam yong ki dei buit yow yoh u booh dor katwa ngait.
Da pyntip leh wa i khang kari toh u man i du ya ki kari wa lai na Lumchnong cha Assam donhi.
Discussion about this post