Hadien wa mih khubor wa yoh ksoh ki pulit Assam hadooh chi lak churia u khoo wa toh u yong ka jylla Meghalaya, heiwa da mih leh i pynbaad wa ye u man toh i pyrchang wow khayi tooh, tangwa neiliang u General Manager ka FCI da klam che u wa ym yoh yutip hajrong ini i pynbaad deiwa ong wa neiliang ka yung krehkaam da dep ko wow phah ya uni u khoo cha ka chnat Social Welfare ka jylla.
Hawa yaklam wa Montri ka chnat Social Welfare, u Kyrmen Shylla ynne ka sngi da pyntip u wa uni u khoo toh uwa haap hapoh ka Fortified Nutrition Programme wei ym toh u khoo uwa hapoh NFSA, heiwa da pyntip u wa da em i bhah yong u khoo cha ka chnat na ka yungkrehkaam FCI, wei uni u khoo toh u pynpoi cha ki Anganwadi Center wei wow saam cha ki khynnah kiwa toh u yoh.
Da pyntip wa ka chnat da booh ko leh ya kiwa chalan ya uni u khoo uwa da yoh na ka FCI, heiwa chwa u pynpoi cha ka chnat, emkaam leh wow pyntikna toh uwa tei ya i doh i pran wei hadien itæ kiwa chalan u pynpoi ki ya oo cha ka chnat yow saam won cha ki khynnah.
Da ong wa ini i pynbiang toh yow man wa tei ya i doh i pran nadooh nachwa, heiwa da pyntip wa nachwa ya u khoo da rah na Meghalaya cha Gurgoan, Delhi wei katni kopsar da rah ya u khoo cha Guwahati neibynta ini i jooh i kaam neibhah hadooh katni ka jylla ym pu em ko ya ka karkhana neibynta ki baam wa tei yei doh i pran.
Hawa kylli, u Shylla da pyntip u wa neibynta 3 bnai næ First Quarter, ka chnat emkaam ko kamwa 1600 Metric Ton u khoo, heiwa da ong u leh wa lada em i leh thok neiliang kiwa chalan næ Supplier, neiliang ka chnat daw leh ko ya iwa emkaam.
