Ka chnat Urban Affairs da rai ko wow khut ya ka Expression of Interest (EOI) da kawa thymme yow wan kiwa em thaw chakhmat neibynta wow pynyoh thaw noh jhep namo ka Landfill neibynta ka chnong Jowai.
Neiling u Symbood Montri Rangbah kamjooh leh u Montri kani ka chnat, Sniawbhalang Dhar da pyntip u wa ynne hadien wa yalang da chim ya ka rai wow pynmih biang ya ka EOI niebhah ki thaw wa da tyrwa nachwa ymtoh kiwa biang wow pyndap yeiwa emkaam.
Ya kani ka EOI daw pynbna ha ka tayaw wow wan, da pyntip chooh chooh u Sniawbhalang Dhar.
Heiyatoh won wa i thaw noh jhep neibynta ka Shillong neidaw wa ka Marten toh kawa da jan dap, u Sniawbhalang da pyntip u wa da dep jied yei thaw wa em hajan hi wei daw pynman man noh ya ka Public Hearing.
Da ong u leh wa ini toh i kaam ka sorkar wow pynyoh thaw noh jhep neibynta ka Shillong wa Jowai wei kat ya ka Marten da ong u wa dang ye u pynemkaam sa 4-5 snem.
“Yow ye u yoh yei thaw noh jhep wa biang emkaam leh yei ya krehlang ki paidbah wei toh u man ki kiwa da pynkhreh wow e yei thaw neibhah emkaam bha wow yoh thaw noh jhep wei khlem yoh thaw cheiwon u noh yei jhep”, da ong chooh chooh u Sniawbhalang.
Heijooh i por sñiawskem u wa ka sorkar daw ye ko wow pynbait ya ini i eh waroh hawa yatoh wa i jhep wei ki paidbah ymtoh u khuslai ki.
Katkam wa ong u Sniawbhalang, neibynta ka Shillong da emkaam 200 Acre i thaw katwa ha kiwi won ki District da emkaam kamwa 50 hadooh 100 Acre i thaw.
