Ha ka yalang wa da pynman ha ka 22 tarik uni u bnai ha Paradiso Conference Hall, Iawmusiang, Jowai, neiliang ka Hynñiewtrep Border Dispute Redressal Forum (HBDRF) da yoh ko u jied wei pynskem ya kiwa kitkaam yong ka neibynta ka le snem.
Kiwa kitkaam man ki kamni:
Chairman – U Chandame Sungoh
Secretary – U Joseph Pyngrope
Vice-Chairman- U Pherdian Samayang
Asst. Secretary- Ka Sumarlangki Talang
Finance Secretary – U Damechwa Syrti
Organizing Secretary- U Thmulangki Sayoo
Spokesperson – U Thomas Passah
Adviser- U Dr. Philo Passah
Legal Adviser- Ka Dr. Fenela Lyngdoh Nonglait
Da jied leh ynñiaw ngut ki Executive Member: U Kerkihame Syrti, u Dowhoi Pala, u Leadingstar Timung, u Don Khongwir, u Larry, ka Darapbiang Mulieh, ka Emila Nongjngi wa ka Poiwan Suchiang.
Kini u man ki kam ki Official Member wa ki Executive Member ki wow kreh yei kaam hadooh u snem 2028.
Hadien i pynskem ya kiwa kitkaam ka HBDRF, da kynmoo warom ya ki san ngut kiwa chah siat yap ha ki Forest Guards wa ki pulit Assam ha ka 22- 11-22 heiwa neiliang u Chairman da ong u, “Dap dei sñiaw lungnood u kynmoo wa ha ka step phyrngap yong ka 22 tarik, ki san ngut ki waheh ka chnong Mukroh kitæ u Thal Shadap, u Chirup Sumer, u Tal Nartiang, u Si Dhar wa u Six Talang da pat yap ki ha ki kuli suloi ki Assam Forest Guards wa ki pulit Assam “.
Ka Forum da rai ko wow booddien yeini wa ka chnong ka Mukroh wei wow dawa yow yoh yei bichaar iwa hok yeini wa chah siat yap kini ki san ngut.
Da rai leh wow booddien ya ki kot ki sla wa da e da thoh cha ka sorkar. Kam wow pynkynmoo wa ha ka 13-11-25, ka Forum da e ko yei pynkynmoo cha u Chief Minister ka jylla, u Conrad Sangma wow paan jubab iyi wa ka sorkar da leh ko neibhah da e por ya ka sorkar wow jubab hapoh chiphaw sngi. Wei kat hadooh kattæ ym pu em u e jubab ko wei ka Forum daw yang ko sa ar le sngi wei lada ym yoh jubab wa biang, daw chong pyrkhat wow chim rai ya ki kaam kiwa toh u leh.
Ka Forum da pynyoo ko leh yei sñiawngooh ya ka Jaiñtia Hills Autonomous District Council wa da yaklam ki heiyatoh wa i kyntoor pood ki Karbi ha ka chnong Lapangap wei da e khublei leh ya ki MDC la Liang Pyrchah kiwa wanrah ya ka Motion wa ya u CEM wa da e u yei jubab.
Ka Forum kyrchaan ko yei yaklam ka Council wow Revise namo wow lai pait lai sylli biang ya u pood u ang ka Council heiyatoh wa ki thaw kiwa jooh kam yabor da ki Karbi Anglong District ka Assam.
Ka Forum da rai ko wow pynman biang da ka yalang kawa rap smat wow chong pyrkhat ya ki kaam kiwa toh u leh.
Discussion about this post