Ka sorkar jylla da lai ko chakhmat wow pyndait noh da ki CCTV ha 47 tylli ki chnong wa kyntoit kiwa em ha sor Shillong, kam chibynta u kdoh u khoom ya ki kaam wa sih kiwa da roi khamtam neidaw wa ku ki kaam thombor ya ki kynthai wa khynnah.
Heiyatoh wa ini, neiliang u Montri Rangbah ka jylla, u Conrad K Sangma da lum yalang u ynne wa waroh kiwa embynta wa kynthup ya kiwa yahkhmat chnong, ki seiñ niam wa ki seiñ kreh monsñiawbha wow yasyllok wei wow thooh ki laad ki luti yow pyndooh ya waroh ki jiat kaam wa sih.
Hawa klam hadien ka yalang, u Conrad da pyntip u wa ka sorkar da yoh ko yei kyrpaad na 47 tylli ki chnong hapoh Shillong wow pyndait noh da ki kor riñdur namo ki CCTV ha ki thaw wa emkaam wei da pyntip u wa napyrdi kini ki chnong, 7 tylli dadep u pyndait wei ya ki 40 tylli kiwi won i pynkhreh dang lai i chakhmat.
U Conrad da ong u wa ha kani ka yalang da yoh yei e buit yow wanrah yei yada wa i chngaaiñ ya ki kynthai wa ki khynnah deiwa pynman ya ki syllok wei e hikai wa yatoh wa ki khynroo khyllood najrong kiwi ki laad ki luti wa ka sorkar wa waroh u chimkhia ki.
Da pdiang u leh wa ha ka chi bnai wa da lai da ku ki kaam thombor ya ki kynthai wa khynnah, wei da ong u wa da emkaam wow leh yow pyndooh yeini deiwa kyntu leh ya ki paidbah wym toh u ngait ki ya kat iwa yoo ki ha ki rynsan Social Media, neibhah wa kani ka juk ki khubor kyndeh hær smat bha ki wei da pynkulmar ki ya ki paidbah wa chong chnong.
Da kyntu u leh wa hawa tip wa em iyi iyi wa toh u thooh chwa yei sakhiat wei wow pyntip leh cha ki bor ka aiñ, heijooh i por da kyntu u leh ya kiwa pynmih khubor ha ki Social Media wym toh u pynmih ya kiwon kiwon ki wym toh kiwa sakhiat kiwa ktah won yei chongsuk chongsaaiñ.
Discussion about this post