December 5, 2022
Ki ar ngut ki khynroo na West Jaiñtia Hills ha kani ka 14 tarik daw lai chimbynta ki ha ka lympung yalehke Judo wa da pynman da ka Judo Federation of India kawa man leh kam ka National Games wei da man ki du ki napoh Ri-loom Jaiñtia wa cha jied heiwa waroh da em 10 ngut deilang wa kiwi kiwa na kiwi ki District ka jylla.
Kani ka lympung wa tip kam ka Junior National Judo Championship 2022-23 ha Ranchi, Jharkhand daw pynman nadooh ka 16 hadooh ka 20 tarik uni u bnai.
Kini ki ar ngut kynthup ki ya u Nangiaidbait L. Pyrtuh uwa na Chutwakhu, Jowai u wow yakhun ha ka kyrdan 66 Kg wa u Daohi Shylla uwa na Moolait, EJH uwa chong wa sah ha Caroline Colony, Jowai u wow yakhun ha ka 72 Kg.
Kam wow kdaw heini u Nangiaid L Pyrtuh da yoh u ar tylli ki takma ksiar ha ka Meghalaya Games (2020) wei da yoh takma ksiar u leh haka State Level Championships (2022).
U Daohi Shylla da jooh yoh takma rupa u leh ha ka State Level Championships.
Neiliang u Wyrta da kitbok i ya kini ki ar ngut wow rah naam ki ya ka jylla waroh kawi.
