Ha ka kynta yatai ya ka Resolution wa da wanrah da u CEM ka JHADC, u Thombor Shiwat hapoh ka dorbar kyrpang ynne ka sngi yow kyrpaad ya ka President ka ri u pynkylla kyrpang ya ki aiñ tih mooyong neibynta ka Ri-loom Jaiñtia deiwa yoh byntalang waroh nadooh ki khian nai kam heipor nachwa.
Hajrong ini neiliang u CEM hawa pynche yei pynbaad ka Liang Pyrchah kiwa ong lymtoh wa em kiwa yakhih chah thngan dawa pynlait mooyong, ka EC ym khyrngiat thiah ko wot hawa toh ka phang wow leh da slem, weiwa yoosar ye u man leh ka buit Politics.
U CEM da ong u wa ini ymtoh i pynbiej paidbah kamwa da pynbaad ka liang pyrchah, tangwa ka EC da chong pyrkhat ko da slem deilang ki stat aiñ næ Legal Expert chirup wa ka seiñ kiwa kreh mooyong kam ka Jaiñtia Coal Miners and Dealers Association.
“Wow pynbaad wa leh wa chim i ya kani ka luti toh wa chah thngan u Marshall Biam man iwa bakla, heiwa u Marshall pathan chah thngan u manda tip u wa ka Council chirup ka Jaiñtia Coal Miners and Dealer Association u pyndep noh ki ya kani ka kaam heitæ sdang u wow chim ya kani ka phang tæ thiah chah thngan u,” da ong u CEM.
Pynrap haroh u deiwa ong weileh ym em chah thngan u nadooh wa sdang lai luti ka Council.
Chooh chooh ong u wym em itæ i thmu wow wanrah neibynta u pynbiej Politics, tangwa kiyi kiyi wa da leh ka Council toh kwah ki wa ka aiñ u pdiang ko wei yow yoh yakrehlang salonsar nadooh ki khian ki nai.
Discussion about this post