Ki pulit dang takit ki hajrong i chah tympiah wei chah leh pynsih ka kari u Pastor Macdonald Pyngrope, lada emyatoh wa i kynrum kynram ha ka Balang næ lada man i du i leh dusmon ha sarok ya ka kari.
Katkam wa khana u Superintendent of Police, u Vivek Syiem, da ong uwa heipor 9:30 da yoh yei pyntip wa ka kari u Pastor da em wa leh pynsih ka wei ya ka ujor wa da booh ha Lumdiengjri da phah noh cha Sadar Police Station.
Da ong u wa ki pulit kattæ da takit wei da chimkhia ki yow chem ya kiwa emkti wei wow tip yei daw hajrong ini wa jia.
Hawa kylli, u SP da pyntip u wa da em ka ujor hajrong i kynrum kynram ha ka Balang wei ki pulit dang takit bniah ki leh lada emyatoh wa ini wa jia hapoh ka Balang.
U Vivek da khana u wa u Pastor Macdonald toh uwa ujor pyrchah yei pynemkaam bakla ya ka poisa ha ka Balang kawa dapoi chadooh Rs. 4 klur, wei ini i kaam da em ko ha Kasari.
Kam wow pynkynmoo wa hei janmiet ka sngi Sunday, ka kari yong u Pastor ka Balang Presbyterian Mawkhar, u Rev. Macdonald Pyngrope, kawa pynyieñ ha rood ka Wahumkhrah ha ka thaaiñ Lawmali Pyllun, da chah tympiah ka yit ko wei da em leh wa leh pynsih ya ka dwar dien wei da suba wa ye u man iwa pynhiar tput neiwa ujor u hajrong kani ka kaam poisa.
Discussion about this post