U Chief Minister ka Assam, u Himanta Biswa Sarma ynne da ong u wa kamwa 3,000 ngut ki khynroo khyllood na ka jylla daw chah hikai ki wow klam dei ktien Japanese khnang wow ye ki u lai kreh cha ka ri Japan.
Hawa yaklam wa kiwa pathai khubor ha Dibrugarh, u Himanta da ong u wa ka sorkar da rai ko wa 3,000 ngut ki khynroo khyllood u chah hikai ki ha i ktien Japanese khnang wow kreh ki ha ki karkhana Japan neibhah heipor wa pynman ya ka Advantage Assam, ki karkhana na katai ka ri da kwah ki wow sikai ya ki khynroo ka jylla.
Da ong u wa manda lai kreh ki cha Japan, daw yoh tulop ki Rs 2.50 lak chi bnai wei wow hikai ya ki daw emkaam, Rs. 3 lak hadooh 3.50 lak heiwa ka sorkar Assam u yarap ko Rs 1.50 lak samen wei ye won kiwa chah hikai wow chim ram na ki Bank ya kawa sah.
Da pynrap u wa ha ka bynta wa nyngkong daw em 3,000 ngut wow chah hikai wei hadien ini ye ki wow lai kreh cha katai ka ri wei em won leh ki karkhana kiwa em pyn ha India.
Hapoh ka Chief Minister Foreign Language Initiative For Global Human Talent (CM-FLIGHT) Scheme, ki khynroo khyllood u chah hikai ki wow klam dei Japanese wei ynne ha ka Cabinet Meeting da rai wow pynkrehkaam ya ka.
Chooh chooh da ong u wa kiwa chah hikai u yoh yarap ki heidur ka Scholarship wa Rs 1.50 lak na ka sorkar.
Discussion about this post