Jowai: Ynne ka sngi hadien wa pynbna u Deputy Commissioner ka West Jaiñtia Hills, u Garod LNS Dykes wa da pyndam ya ka hukum wow pynman Containment Area ya ka Dongmihsngi, Jowai da mih i kulmaar hapyrdi ki paidbah khamtam ki tre dukan heiyatoh wa ini.
Hajrong ini hawa yaklam wa u Waheh Chnong ka Dorbar Chnong Ladthadlaboh u LD Lakiang da ong u wa ka hukum wow pynman Containment Area ha ka chnong dang pteiñ i ko hapoh u pood u ang ka chnong wei ki dukan dukdoh hapoh u pood yong ka daw man ki kiwa khang.
Da pyntip leh wa hajrong ki dukan dukdoh hapoh ka chnong wot wa ya ka Yawthymme leh u man ko kawa khang hadooh wa pynmih hukum ki bor District deiwi tawon.
Chooh chooh heiyatoh wa ini, u Lakiang da kyntu u ya ki paidbah wow man ki kiwa yakrehlang wa ki bor ka District khamtam ka chnat i chait i khiah kam ha ini i por.
