Shillong: Ka satri yong ki seiñbhalang ka jylla kawa tip kam ka Confederation of Meghalaya Social Organisation (CoMSO) da pynbna ko wow lai ko chakhmat yei pyrchah ya ka sorkar katwa ympu wanrah ya ki kyndon ka Inner Line Permit (ILP) hapoh ka Meghalaya Residents Safety and Security Act, 2016. Ini i rai ka CoMSO toh hadien wa u Montri Rangbah, u Conrad K Sangma da khut yaklam u ya ka ynne ka sngi heiwa da emlang leh u montri wa pait ya ka chnat pynroi sor ka jylla, u Hamletson Dohling.
Ka CoMSO ynnin ka sngi da pynman ko ya ka yalang paidbah ha Motphran, Shillong kam ka dak wow pyrchah wei wow pynche paidbah yei emkaam ki kyndon ka ILP wow thap ha ka MRSSA, kawa da pynbna leh wow pynman da i sangeh u mih sarok chi miet.
Hawa yaklam hadien ka yalang wa u Montri Rangbah, u Chairman ka CoMSO, u Robertjune Kharjahrin da ong u wa ka yalang da lai bait ko tangwa ym em kubur u wa man ko kawa jop hanlada ong u wa u Montri Rangbah da pynsñiaw u wa ka sorkar em ko i thmu wow pynpsiah ya ki kyndon ka ILP ha ka MRSSA.
Da ong u leh wa neiliang u Montri Rangbah da klam che u hakhmat ka CoMSO wa daw rah u ya kani ka phang ha ka yalang ka dhab ki montri (Cabinet) wow pyndep smat katwa ye ya ini i kaam.
“U Montri Rangbah da pynsñiaw u wa sa kawi næ ar sien u phyllu yumut da ka Cabinet dang man i iwa emkaam, wei ka sorkar daw leh smat ko katwa ye wow pyndep yei kaam,” da ong u Kharjahrin.
Da ong u leh wa i pyrchah ka CoMSO u pteiñ bait i katwa ka sorkar ympu ye ko wow wanrah ya ka aiñ lada man ko lyngba ka Ordinance namo lyngba ka dorbar wa kyrpang.
Chooh chooh da ong u wa ka CoMSO ym em booh por ko ya ka sorkar neibhah da kut i nadooh wa ym em u wanrah ki ya kani ka kaam ha ka dorbar wa dang dep wot.
Discussion about this post