Ynne ka sngi ka Joint Action Committee (JAC) wa kynthup ya ka Jaiñtia Hills Truck Owner Association, ka Jaiñtia Hills Clinkers and Transporter Association wa ka Meghalaya Truck Union da khut pynman ko da ka General Emergency Meeting heiwa da wan chimbynta da ki spah ngut.
Hadien ka yalang General Emergency Meeting hawa yaklam wa u Chairman ka JAC, u Nehemayah Tyngkan da ong u wa nadooh ka 7 tarik uni u bnai da sdang ya kani ka yakhih wei ynne ka sngi da khut u DC ka East Jaiñtia ya ki wow yaklam wei wow kyrpaad wow pynkut noh ya ka yakhih.
Neiliang u DC da kylli u wa lada em i pynsangeh ki ya ki truck wei ka JAC da ong ko wa neiliang yong ka da kyntu hi-eh ko ya ki wow krehlang wa ka JAC hadooh wa ki karkhana u pynkrehkaam ki yei dor ka sorkar iwa ymtoh u duna ya ka T. 7 chi kilometer chi ton.
U DC da pyntip u wa da thoh u leh cha u Commissioner Secretary ka chnat Transport wow pynche wa lada kani ka Notification u krehkaam i cha Assam leh namo du ha Meghalaya donhi mo.
U Tyngkan da ong u leh wa ynne ka sngi ha ka yalang ka JAC ha Takhniang da rai wa kat wympu pynkrehkaam yei dor wa da booh ka sorkar i yakhih u pteiñ i wei wow man kawa jai-jai wei hadooh katni waroh ki Transporter leh da sangeh ki wow kit mar na ki karkhana wei kiwa lait toh du ki truck ki karkhana donhi.
Neiliang u Nidamon Shullet uwa man u President ka Jaiñtia Hills Truck Owners Association (JHTOA) da ong u wa heiyatoh wa ini i yakhih neibynta i hok ka jaitbru katkam wa da booh dor ka sorkar, tangwa ki karkhana da pyntip ki cha ka sorkar wa bien hi ki wei dang pynkrehkaam ki ya ini i dor tangwa ini man i mar dei kangtleiñ.
Da kyntu u leh ya ki paidbah wa ki tre truck napoh ka jylla wow krehlang wa ka JAC wow em i yatylli wei kat wympu bait wow su yei dor wa da booh ka sorkar toh u sangeh chwa wow kit mar na ka ki karkhana.
U Monte Ranglong uwa man kam President ka MTU da kyntu u yei yakrehlang neibhah, wa ki karkhana da leh ki chiboon ki kaam pyrchah ya ki tre truck wei ka JAC da raikut ko wow yakhih hadooh wa yoh yeiwa dawa ko.
