Jowai: Da i sñiawkhia hajrong i roi ki kaam dih drugs hapyrdi ki khynroo yong ka thaaiñ iwa da sdang soohthied ha Iew Mawkyrwat kawa man leh ka District Headquarter yong ka South West Khasi Hills District, Ka KSU Mawkyrwat Circle daw pynman ko da ka lai paidbah waka yalang paidbah (Rally-cum- Public Meeting) haka 25 tarik uni u bnai nadooh i por 10 waje i step.
Ya ka lai paidbah u sdang na laad yungkrehkaam ka Mawkyrwat C&RD Block wei u pynkut daka yalang paidbah ha Iew Mawkyrwat. Ka seiñ da rai ko wow pynman ya kani hadien wa ka chem ko ya i roi i drug hapoh ka thaaiñ kawa da ktah ya chiboon ki khynroo wa ki manyung mansem hapoh ka thaaiñ. Ka seiñ da khut sñiawbha ko ya ki manbei manpa, ki khynroo khyllood, ki seiñbhalang waphær waphær, ki skur, College, kiwa yahkhmat ki chnong waphær waphær kiwa em yaka sñiawkhia wa i kitkhlieh hajrong kani ka kaam wow ya mih lang ha ka tai ka sngi kam chibynta wow pynsñiawthooh paidbah wei wow kyntu ya ki bor wa toh u pait ya ini wow chimkhia ki hajrong kani ka phang.
Chooh chooh, kani ka seiñ lyngba kani ka kyrwoh da maham ko leh ya kitu kiwa jooh myllien wow kyrchaan poisa ya kiwa khayi drug wei kamjooh leh ya waroh kiwa khayi drug kiwa jooh myllien wow phon ya ki khynroo hapoh ka thaaiñ yow chah kdoh ki ha i dih drug.
Ka seiñ ym chongngiah ko hajrong kani ka kaam wei kam ka seiñ ym kynran dien wei da rai wow lai bait chakhmat lada ha kawon kawon ka luti. Ka seiñ heijooh i por ka pynsñiaw ko yei sñiawkhia hajrong i leh stiñ palat yong ki bor District ya kani ka kaam kamwa da jia ha ki por wa kem ya kiwa khayi drug ha chnong Nonglang heiwa i jngai wa du 2 Km na District Headquarter tangwa chimpor won hadooh 4 kynta ya ki bor District wow wanpoi yow leh ya iaw emkaam. I kwah i wow yoo ya ki bor sorkar wa ki ym toh u klam ki du da i ktien wa ki pyrchah drug ki wei toh u pynyoo ki leh da ki kaam khnang wow yoh ki ya i chaniah na kiwa boon wa lang neibhah kamwa man katni lait naka seiñ wa ki seng samla chnong ym pu yoo chisien leh wa ki bor sorkar da yoh kem khayi næ kiwa dih drug hapoh ka thaaiñ.
I por dang biang bha i wow khyrngiat noh na kini ki ma kiwa yong yaka mynried yong ka ri wa ka jaitbru wei kam ka chnong ka thaw i emkaam i yaka yatylli hawa yaleh pyrchah ya kani ka kaam nadooh kiwa yahkhmat chnong, VDP, ki seiñ manbei wa kiwi kiwi.
Ini toh katkam ka kyrwoh na u Rutherford Lyngdoh, General Secretary, KSU Mawkyrwat Circle.
Discussion about this post