Shillong: Ka Hynniewtrep Youth Council (HYC) da maham ko wow pynkrehkaam hi ko ya ka Inner Line Permit (ILP) hadien wa ki 12 ngut ki montri sorkar MUA-II wa kynthup ya u Montri Rangbah ym wan ki cha ka yalang wa khut sa seiñ wow ya phyllu yumut hajrong ka ILP wa kiwi kiwi de ki phang wa ktah ya ka jait bru.
Ka HYC da kwah ko leh wow yaklam chaphang ka Trading Licence, ki aiñ chongwai wa ki kaam Benami wei da pynkhreh ko ya ini ha Khasi National Hall, Mawkhar wei da yang ki ar kynta ya ki montri wow wan ki.
Ha kani ka sngi neiliang u president ka HYC, u Peter James Lawai da pynbna u leh wa daw pynman leh da ka yakhih wa jai jai wei daw sdang dei deiñ lama rong yong ha waroh ka nongbah Shillong ha ka 26 tarik uni u bnai wei daw pynbood won da i lai chong kyllaiñ myngngor hakhmat ka Additional Secretariat ha ka 27 tarik wei ha ka 29 tarik won daw khut ya waroh ki MLA wa kyrchaan ya ka sorkar MUA-II wow yaklam ya ki phang wa boon wa kynthup ya ka ILP.
Deiwa sñiaw kthang yei wym chimkhia kiwa mihkhmat wow pyrkhat yei chitom wa chem ki paidbah da rai ka HYC wow pynkrehkaam noh da ka pyn da ka hi ya ka ILP kawa man ha khmat dooh i dawa ka seiñ.
U President ka HYC da ong u leh wa ka HYC man ko kawa da pynkhreh wow tyngkhooh ya iwon iwon wow mih neini hadooh wa ki bor ka aiñ.
Da ong u leh wa kam ka seiñ ym ye de ko u chah yei leh kani ka sorkar ka wow ktah ya ka jaitbru.
Discussion about this post