Ka Dorbar Chnong Khlookynrien, West Jaiñtia Hills District da pynkhai im biang ko ya ka E-Yadaw Rong kawa da chah ieh mylliñ kamwa da 29 tylli ki snem, heiwa ha uni u snem 2024 da pynkhai im biang ya ka kamwa da hikai da booh da ka seiñ ki manchwa longchwa.
Ya kani ka E-Yadaw Rong daw pynman ha ka 30 tarik u Naikhynde (September) 2024 ha Madanbol Tiriang heipor 11:00 waje i step.
Kani ka E-Yadaw rong toh kawa da pynjooh da ki longchwa manchwa ha ki por wa dadep wow thung u tep cha ki hali hator wa chwa u pynlum ya u kba u khoo.
Kamtæ ka Dorbar Chnong Khlookynrien dei mynsien wa maya khut sñiawbha ko ya waroh ki khon ki hajar yong ka Bri u Ynñiawtrep Ynñiawskum kiwa najan najngai chynrang wa kynthai wow ya wan pynchongchit cha kani ka E-Yadaw Rong.
Ha kani ka E-Yadaw Rong daw yoh phi chiboon ki yalehke wa boonjait ki wow pynwyrngia ya phi.
Neiliang ka dorbar chnong da khang pyrchah ko wa ym hoi wow dai ya waroh ki jait dih pynmuaid ha katai ka sngi, kamjooh ya kiwa wan deiwa muaid. Da kyrpaad leh ya ki paidbah waw ya ksohkti lang wa ka chnong khnang wa kani ka lehkmen u man ko kawa phooh wa phieñ.
Lada jia wa chem ya kiwon kiwon kiwa leh pyrchah, ka bor chnong daw pynchitom ko ya ki katkam ka aiñ.
Kamtæ ka dorbar chnong yooluti ko i yawan yong phi ki paidbah daw chit wei u pynsñiawbha ko ya ka chnong hi waroh kawi.
I pyntip na u General Secretary ka Dorbar Chnong Khlookynrien, u H. Shadap Manar.
Discussion about this post