U pynman noh ka WJSU ya ka Exam yow jied ya ki wow yoh ya ka 1st War Jaiñtia Scholarship

Ka War Jaiñtia Student Union Central Body kam chibynta i pynkhreh ya ka 1st War Jaiñtia Scholarship Examination 2024 neibynta ki khynnah skur, ynnin da pynman yalang ki wa ki Principal, Headmaster, Headmistress wa Head Teacher yong ki skur Lower Primary wa Upper Primary School waphær waphær wa em hapoh ka thaiñ War Jaiñtia.

Ha ka yachemlang wa da man ha Riwar Jaiñtia Church of God School Ladjaplem Amlarem, neiliang kiwa sikai yong ki skur waphær waphær wa ki dkhot ka WJSU da ya e buit kylliang ki heiyatoh kammon u pynlai bait pynlai ryntih ya ka Scholarship Examination.

U Alban K. Gashnga, Chief Adviser ka seiñ hawa klam da batai pynche u hajrong kani ka Scholarship Examination deiwa ong wa ya ki khynnah wa em sap hei puræ puthi nadooh dang khian toh u e yarap poisa hei dur ka Scholarship, wei u pynmyllien leh ya ki nadooh dang khian ha kam kini ki Competitive Examination khnang yow myllien ki hadooh wa heh wei u jop leh hei luti puræ puthi ki.

Yooluti u leh wa lyngba kani ka Competitive Examination ka thaaiñ War Jaiñtia u nang ye ko u  pynmih chiboon ki sahep IAS, IPS, MCS wa MPS ha ki snem wow wan.

Related posts

Ym em sabut wa da jooh lehniam ki Hindu da ki spah snem ha krem Mawjymbuiñ

December 21, 2024

Pynbna ka MBOSE ya ki tarik thymme neibynta ka SSLC wa HSSLC

December 21, 2024

Ha kani ka yalang da yoh leh i klam na u SP wa da chong ngiah uwa man leh kam uwa e buit ka seiñ, u K. Rymbui heiwa da booh u i kyntu ya kiwa sikai wow pynsñiawthooh kylla ya ki bei ki pa yong ki khynnah skur yow pynchlur ki ya ki khon u chimbynta ha kani ka Competitive Examination.

U President ka seiñ WJSU, u Jambok Lanong yooluti u wa lyngba kani ka Exam, ki khon ki kti yong ka thaaiñ daw yoh ki wow khait ya u soh wa thiang hei im yong ki.

Neiliang u Education Secretary ka seiñ, u A. Sumer pyntip u wa ya ka Scholarship Examination daw pynman ha ka 14 tarik Kmaichonglad (Dec) 2024, wei daw pynman ha ki 14 tylli ki Examination Centres, katwa ya ka Scholarship daw saam ha ka 21 tarik u jooh u bnai ha Amlarem.

U General Secretary ka seiñ, u Everest Langstang da e khublei u ya waroh kiwa sikai kiwa da yaksohkti lang hajrong kani ka mat, neibhah waroh kiwa da klam e ki i kyrchan wa pura ya ka seiñ wa da chim ko ya ka mat bah wow wanrah i miat i bha neibynta ki khynnah skur.