Ka jylla Meghalaya kam chibynta i pynkhreh ya ka 39th National Games 2027, da pynman ko ya ka Meghalaya Sports Conclave deiwa wanrahlang ya kiwa yalehke wa bna naam, kiwa chna Policy, ki bru chemphang ha ki kaam yalehke yow yaklam hajrong ka mynried wa ka rukom pynlai ya ki kaam yalehke, ki buit thymme, i chna i tei wei pynroi yei sap kiwa yalehke.
Ha kani ka Sports Conclave da wan sakhi da u Conrad K Sangma, Montri Rangbah, u Wailadmiki Shylla, Montri kaam yalehke ka jylla, u Dr. Adille Sumariwalla, Vice President, World Athletic najrong kiwi de.
Ha kani ka Conclave da chimbynta da kiwa yalehke wa bna naam ka ri wa kynthup ya ka Manu Bhaker kawa yoh Medal ha ka Olympics wa ka World Champion Shooter, u PR Sreejesh, uwa yoh Medal ha ka Olympics, ka Hima Das kawa phet pyllah kawa yoh ya ka khusnaam Arjuna, u Harvinder Singh uwa yoh Medal ha ka Para Olympic wa ka Sheetal Devi, World Archery Para Champion, kiwa da ya khana yeiwa chem ki wa iwa emkaam ya ka rukom krehkaam kawa kyrchaan ya kiwa yalehke.
U Conrad hawa e yei klam da ong u wa ka sorkar da sdang ko yei kreh wa heh tam hapoh ka ri deiwa sdang ya jan dap 240 tylli ki Project heiwa da em kiwa dadep chna, em kiwa dang chna wei kini ye ki wow ku cha 500 tylli hachwa u 2028. Ka jylla da mang ko Rs. 72.5 klur neibynta i pynkhreh ya kiwa yalehke ka Meghalaya ha ka National Games heiwa dadep wow thooh ya kiwa em sap deiwa chem palat 50,000 ngut heiwa na kini palat 1200 ngut dang em ki kattæ hei chah sikai ha ki Sports Association waphær waphær.
Ha kani hi ka sngi, u Pynshngain Kurbah uwa man kam uwa kiñlieñ uwa yoh Bronze Medal ya ka Meghalaya ha ka 38th National Games wa da pynman ha u snem 2025, da man u uwa nyngkong dooh uwa yoh ya ka Meghalaya Outstanding Sportsperson Direct Appointment Policy (MOSDDP) kawa man ka Policy thung kreh sorkar ya kiwa yoh Medal ha ki yakob hapoh ka ri wa cha baar ri.
Da pynkup burom leh ya 15 ngut kiwi kiwa da lehbhah ha ka Archery, Athletics, Swimming, Weightlifting, Wrestling wa Football deiwa e leh da ka song poisa kawa Rs. 25,000 hadooh Rs. 87,000.
Discussion about this post