Kam chibynta wow pynyabi ya ki sor ka ri wa kiwi thaaiñ, da jied ya ki 22 tylli ki luti thymme ha ki 3 sngi hapoh ka UDAN Scheme, wei na kini, 6 tylli ki luti toh ha ka thaaiñ mihsngi (North-East India).
Ka lieñsuiñ wa nyngkong namo ka Direct Flight na Shillong (Meghalaya) cha Agartala (Tripura) hapoh ka UDAN Scheme da sdang ko ynnin ka 30 tarik hadien wa da sdang ya ka Shillong (Meghalaya)- Silchar (Assam) ha ka 29 tarik.
Ha kini ki sngi da em leh ki sahep ka Ministry of Civil Aviation (MoCA) wa ka Airport Authority of India (AAI).
Ha ka 28 tarik uni u bnai da sdang ya ki 18 tylli ki luti lieñsuiñ wa thymme hapoh ka UDAN Scheme wei kitæ toh ka Gorakhpur (Uttar Pradesh)-Lucknow (Uttar Pradesh), Kurnool (Andhra Pradesh)-Bangalore (Karnataka), Vishakhapatnam (Andhra Pradesh)-Chennai (Tamil Nadu), Agra (Uttar Pradesh)-Bangalore (Karnataka) wa Bhopal (Madhya Pradesh), Prayagraj (Uttar Pradesh)-Bhubaneswar (Odisha) wa Bhopal (Madhya Pradesh). Da sdang leh ya ka Dibrugarh (Assam)-Dimapur (Nagaland).
Ka Indigo da chah jied ko wow hær na Shillong-Agartala, Shillong-Silchar, Kurnool-Bangalore, Vishakhapatnam, wa Chennai hapoh ka UDAN 4 wei i lilam da sdang i ha u snem wa dadep.
