Ha ka yalang lai paidbah wa da pynman da ka dorbar chnong Mynsngat ynne ka sngi kam i dak wow beiñ joor ya ki 3 ngut wa suba emkti tynyap ya u Pynkhreh Surong kiwa kynthup ya u Sambun Dkhar uwa na Mynsngat deilang wa u Meban Talang wa u Jimmy Kyndait kiwa na Moorap.
Neiliang u Bijoy Tariang uwa man u pa yong u I Love You Talang wa u Meban Talang da mih u chakhmat wow pynche paidbah heiyatoh wa kini ki arngut ki khon u deiwa ong wa wym em psa u ya ki khon u dei tooh, dei chohnoh wow kwah da iwa yong ki lok wei kat dang em ki ha kti yong oo dang man ki ki bru hi.
Tangwa hadien wa lait ki nei kti yong oo wow synchaar ki pyn da ki ya ki hi ym tip de won u kammon da jia ya ki.
Kamtæ da ong u wa ym kwah u wow bood naam ka chnong ka thaw wow ong ki bru wa sa du kiwa pynyap bru wei kam ka yung lada chah aiñ lada ym ye ko u kset, u pynyap pyn da i ya u khon yong i, u payu para ka chnong.
Da ong u leh wa neini chakhmat ym toh de u mih kam kini ha ka yung ka sem wei kamjooh ha ka chnong ka thaw wei lada dang pynlait ka aiñ toh u chim ki paidbah yei bor yong ka aiñ.
