15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

U sah khana parom ka kur Sansyngkong ya ynne ka sngi wa da yoh u wai ya ka Yung Kur yong ka

0 Comments
Advertisement ad1
Advertisement ad1
Advertisement ad1

Jowai: Ynne ka sngi 29 Naiynñiaw 2017 da man ko ka sngi wow sah khana parom ya ki khon ka kur Sansyngkong Jowai yeiwa da yoh ko u wai yei Yung Kur yong ka iwa man i yung yonglang iwa em ha ka chnong Dulong Jowai wei ya kani ka Yung da wai da u Moonlight Pariat uwi na ki waheh yong ka kur uwa man leh u MDC ka Jowai South kam u kongsan hei emlang ka khon kynthai yong ka kur ka B. Blah kawa man leh ka BDO Thadlaskein Block kam ka symbood kongsan.

Ha kani ka sngi da emlang u Dolloi ka Elaka Jowai u P. Kynjing, R. Nartiang Pator yong ka Jowai, u O.R. Challam President ka Seiñraij Jowai, u L. Paswet Gen. Secy. Kur Sookpoh, u K. Lato Gen. Secy. Dulong, ki Waheh Chnong/Secy yong ki dong Seiñkur wapher wapher kamjooh hei yaemlang ki khon yong ka kur nadooh ki khian hadooh heh khamtam kiwa da wan naduh na Ummulong, Shillong wa na kiwi tawon ki chnong.

Hachwa wow wai ya u moo-yurim yong kani ka Yung Kur, da pynman da ka yalang watbian hei pyllai u B. Shilla wa u T. Pde.

Da yoh yei kyntien ngooh blai na u Sniawhi Pde wei da khana ya ka parom wa tbian yong ka kur da u Lakhon Shilla uwa man leh u Chairman ka kur.

U R. Nartiang da e u yei klam chibynta na ka Chnong Dulong, hei klam yong oo da yaroh heijooh i por e u yei kyrkhu khyrdoh ya ka kur Sansyngkong neibynta wow biang u bit ki kaam yong ka liang wanang.

U P. Kynjing Dolloi kam u khlieh synchaar ka Elaka Jowai da e khublei u ya ka kur kawa em i kitkhlieh neibynta ibha i miat yong ka kur kamjooh ka chnong hi waroh kawi, da kyrsu kyntu u ya ka kur yow man ko kawa husiar ya kiwon kiwon ki jaitbru kiwa thmu wow pynkylla kur kulmar næ e jait kawa wanrah yei wit i thut ha i mantre khamtam ka dustur riti. Heijooh ipor kyntu u ya ka kur yow ye chooh chooh ko u pynjanai ya ki kaam wabha kamjooh yow pynskem yei mantre ha ka chnong ka thaw na kawi cha kawi ka pateiñ.

Ka B. Blah kam ka symbood kongsan dap ko dei sñiawkmen ko wow yohlaad ko u ya emlang kam ynne ka sngi heiwa da yoh u yachemlang næ yatipmit wa ki kur ki jait, heijooh ipor da yaroh ko ya ki wa yahkhmat ka kur heiwa da ye ki u pynlum pynlang khamtam ya ki dkhot yong ka kur kiwa em chajngai dei ngait skem wa i em yong ini i Yung Kur u wanrah ko ya i yajooh yajan parakur lyngba i yachemlang i wow pynman man ipor.

U Moonlight Pariat kam u kongsan ha kani ka sngi hei klam yong oo sñiawkmen wei chngain i mynsien u hawa yoh u kam kani ka laad wow yachemlang wa ki para kur. Da ong u wa i em kani ka yung yonglang daw wanrah ko ya i yajooh yajan næ yatipmit para kur.

Da kyntu u leh ya waroh ka kur yow man ki kiwa krehchitom kamjooh u em i mynsien khihchitom, yakrehlang, yarapkylliang khnang yow ye u pyndep yeiwon iwon i thmu wabha.

Neiliang u N. Pde Gen. Secy. da e u yei kyntien makhane ya waroh.

Ha kani ka sngi da pynkup burom leh ya ki tynrawde ki waheh ka kur kiwa man kam kiwa saiñdur heiwow pynlang pynlum ya ki khon nadooh warim kiwa kynthup kini hawah:

  1. Ksan Shylla na Panaliar,
  2. Harington Pde na Chilliangraij,
  3. Keling Pde na Chilliangraij,
  4. Khroo Pariat na Chilliangraij,
  5. Earnest Roy Shylla na Panaliar,
  6. Ram Blah na Iongpiah.

Share this:
Previous

Wow pynsap ya ka Bei Rym-aw da ki sula wa yirngam, thung ka DC Tuber Kmaichnong da 4,200 ki tre dieñ

Next

Sdang ka 17th Inter Dong Football Tournament wow jied ya ki wow mihkhmat ya ka Ummulong ha ki lympung wow man