Neidaw wa da mih boon i ood i naam na ki tre ki dukan dai kiad (Wine Shop) wa joor hiar ka yaaw ka haat neiwa em boon palat kini ki jait dukan, neiliang ka sorkar Meghalaya da rai ko wow sangeh chipor yei e bor namo ki License wow wai ki dukan dai kiad thymme deilang ki Bonded Warehouse.
Yeini da pyntip da u Montri ka chnat Excise, u Kyrmen Shylla ynne yow yoh por u pyrkhat kammon u leh ha ki por wow wan deilang ki kyndon hawa e License.
“U sangeh chwa i wow e License chipor, wei ki sahep sorkar dang pynman ki yei thooh bniah yow tip heiwon i thaw wa dang emkaam wow wai dukan dai kiad wei ha kiwon ki thaw wa hap wow pynduna,” da ong u Kyrmen Shylla.
Da pyntip u wa kiwa da em License katni da pynsñiaw ki yei hiar i dai ki neidaw wa da joor boon ki dukan dai kiad khamtam ha ki kattu katni ki thaw. “Deiwa pait ya kini ki ujor, da rai i wow sangeh chwa wow e License thymme kat wym pu dep u leh yei thooh bniah,” da ong chooh chooh u Kyrmen.
U Montri da ong u leh wa ka sorkar daw pait ko leh yei em ki thaw dai kiad hajan ki thaw puræ, ki thaw mane deiwa khana leh ini wa dep ym em de e License thymme.
Da pynche u leh wa ya ki License da e deiwa yoh No Objection Certificate (NOC) na u waheh chnong, neibhah ki tip bha ki yei sñiaw kiwa chong chnong yow lait u mih iwon iwon i thut i wym sñiawsuk hadien habood.
Da ong u leh wa ki dukan dai kiad kiwa da em chwa u pteiñ hi ki wow krehkaam, wei lada jia wa em kiwa kwah wow kyrriah thaw daw bichaar yeini katkam wa emkaam. Wei da phah leh ya ki sahep sorkar ha kawi pa kawi ka District wow lai pait lai sylli ki yow pyntikna wa waroh bood ki ya ki kyndon.
Discussion about this post