Ka seiñ kiwa khayi pateiñ ka India kawa tip kam ka All India Traders (CAIT) da chim ki ya ka rai yonglang wow sangeh noh ya waroh ki jait khayi wa ka Pakistan hadien iwa jia ha Pahalgam.
Yeini i rai da chim hadien wa pynman ya ka yachemlang wa ar sngi ha Bhubaneswar deiwa wan chimbynta da palat 200 ngut ki heh khayi na ki 26 tylli ki jylla ka ri.
U Secretary General ka CAIT uwa man leh kam u MP ka Chandni Chowk, u Praveen Khandelwal da pyntip u wa hadien ka yalang da chim ya ka rai deiwa mynjurlang da waroh wa kam chibynta wow beiñ yeiwa jia ha Pahalgam, u sangeh noh ya waroh ki jait khayi wa ka Pakistan kamjooh wow wanrah leh kiwi kiwon ki mar na Pakistan cha India i wow sdang chisiendon.
Kam wow kdaw heini wa hadien iwa jia ha Pulwama ha u 2019, da ktah chwa i khayi pateiñ hapyrdi kini ki ar ri. Wei katkam ka yukheiñ ka CAIT, i ya khayi toh iwa heh dooh iwa dapoi USD 3 Billion ha u 2018, wei da hiar cha USD 1.2 Billion ha u 2024.
Nadooh u April 2024 hadooh u January 2025, ka India da phah ko ya ki mar wa chongdor kamwa USD 500 Million cha Pakistan kiwa boon toh ki dawai, ki Chemical, i chini wa ki tiar kari katwa na Pakistan won dapoi ki mar wa chongdor USD 0.42 Million, katkam wa ong ka CAIT. Wei da ini i rai, ini waroh u sangeh noh i kattu neidaw wow ya khayi wa ka ri wa choon ya ka India toh i wym ye u pdiang wei kwah ki leh wow pynyoo yei yatylli.
Ha iwi won i liang, ka CAIT da dawa ko na ka sorkar pyrdi deilang ka GST Council wow pynchitom ya kiwa leh ya ka yaaw Online namo ka Quick Commerce wa ki e-Commerce Company deiwa kheiñ 28% ka GST neibynta yong ki deiwa ong wa kini ki rynsan i rukom dai tiar toh u kheiñ ki kam ki kamai yong kiwa malik (Luxury) wei toh u ngat ki leh da ka dan wa yatoh wa ini.
Ka CAIT da pynbaad ko leh wa kini ki e-Commerce wa ki Quick Commerce Company da tyngkheiñ ki ya ki aiñ deiwa dai leh da ki mar wa chna thok wei da leh ki heitæ i rukom wow ktah yei khih i khan kiwa khian wa nai.
Discussion about this post