Jowai : Ka HNLC da pynsñiaw ko yei sñiawsih heiwa ym ye ka sorkar u yada ya ki kynthai kiwa em hapoh ka jylla heiwa ki kaam pyrchah ya ki kynthai khamtam ki khynnah dang roi ki, na kawi ka sngi cha kawi.
Ka seiñ da pynbaad ko wa ki tnat pulit boonkaam ki du wow booddien wei wow kem ya ki dkhot ki seiñ kieñ suloi tangwa ki kaam dih drugs dai drugs rngip hi-eh ki khmat ki.
U Montri Rangbah ka jylla hei klam yong oo da ong u wa sñiawkhia u ya kini ki kaam wa pyrchah ya ki kynthai tangwa u Home Minister yong oo won u HDR Lyngdoh lait hi-eh u khlem chah pynchitom hei yatoh wa jia ki kaam slaitbor pyrchah ya ka khynnah wa dang 14 snem pyn ha i Guest House wa pyllai kiwa ha yung u HDR Lyngdoh.
“Hei sakhiat u HDR toh u hiar chuki u pyn da oo hi khnang wa i takit yow lai bait lai ryntih i khlem theh ka pyrla chilliang” da ong ka HNLC.
Ka HNLC da pynbaad ko leh wa ki Meghalaya House wa em ha Delhi wa ha Kolkatta man ki leh kam ki thaw yachem kynthai ki MLA, tangwa ka seiñ ym em u kwah ko u pynmih pyrtuid ya ki.
Ka seiñ da ong ko leh wa ka Congress smat ko u yada ya ki MLA kiwa da chahbaad, kam ka Ampareeen Lyngdoh, ka Deborah Marak wa kiwi kiwi.
“Lada ka aiñ ym krehkaam ko pyrchah ko ya ki heh ki haaiñ wow yoh yei bichaar wa biang, ya ki paidbah pathan da sñiawthooh chwa wa daw sahteiñ i bichaar ka aiñ” da ong ka seiñ.
Kamtæ ka HNLC da pyrkhat ko yow pynim biang ya ka ‘Operation Kyllang’ (pyndaiñ tylla da u tylla ha chkoor kamwa leh na chwa) yow pynchitom ya kiwa slaitbor wei yeini ye u leh du dei krehkaam lang ki paidbah wa ka seiñ wei i pynchitom u man i iwa joor bha hadooh wow chim leh yei mynsien kiwa emkti.
Hei yatoh won wa ki kaam dih drugs dai drugs da yoo wa chah kem du kiwa dih wa kiwa dai khian dai khutia heiwa ka seiñ da pynbaad ko wa em hi leh ki pulit kiwa dih drugs neibhah da kylli ko i drugs wa kem ki pulit cheiwon lai i?
Ka seiñ da ong ko leh wa ka sorkar ymtoh u mylliñ ko yei yap ki bru nei dih kiad khamtam ki khynroo kiwa em hapyrdi i rta wa 25-45 snem i rta wei u Montri Rangbah toh u lai yoohkjat u cha ki thaw sumaar wow chem yeiwa sakhiat. Da pynbaad ko leh wa i kiad wa lieh kamjooh i yong pharæng toh i daw wa boonsien jia ki kaam pyrchah ya ki kynthai nadooh i chah slaitbor, i dat kurim wa kiwi kiwi.
Da ong chooh chooh ko “I drugs toh iwa syad, i kiad toh iwa toh dor wei heijooh i por leh i kiad wanrah poisa ko ya ka sorkar lyngba ki dan wa yoh ko na ki kiad kamtæ ka sorkar kheiñstiñ ko ya ki kaam sih wa mih na i kiad wei wa i kiad man i leh wa ka-it bha ki MLA yong i u dih, kiwa dih deiwa syad dor bait, katwow yarap won ya ki paidbah kiwa takhooh ha ki yatyrrah kari ha West Khasi Hills wa ha East Jaiñtia Hills da e ki T. 50,000 ya kiwa yap wei du T. 20,000 ya kiwa mynsoo, katwa ka Sorkar Bei won da e ko T. 2 Lak cha kiwa hayung kiwa da khlaad wei T. 50,000 cha kiwa mynsoo”.
Kani hi ka jooh ka sorkar jylla wa da pyllut ko da ki klur yow pynman ya ki kaam pynwyrngia wa ha rukom, kiwa yoh myntoi du ya ki bru samen katwa ki paidbah ym yoh ki iyi iyi leh na kini ki kaam wa leh ko, katwow yoo ood ka sorkar man ka sngi wym em poisa ko.
Ka seiñ da pynkut ko deiwa ong wa ka seiñ ym em u pyrchah ko yei wan ki rel kamjooh leh ki kaam pynroi hapoh ka jylla tangwa ka sorkar emkaam ko wow pynkrehkaam noh ko yi Entry wa ki Exit Point yow ye u sylli yei lai i wan ki baar jylla chapoh ka jylla. Heiwa da e daw ko wa ka rel toh ka wow yarap yow pynhiar dor ya ki mar ha ki yaaw ki hat.
Kani toh katkam ka khubor wad a phah da u Sainkupar Nongtraw uwa man kam u Publicity Secretary ka Seiñ.
Discussion about this post