Jowai: Ka tnat Wildlife yong ka ri-loom Jaiñtia Hills katkam wa pyntip ka DFO (W) ka H. Lato da ong ko wa ha kini ki bnai wa da dep ka tnat do yoh ki u pyllait ya kiwa boon ki mrad khloo kam ki Slow Loris, Rose Ring Parakeet (Lato), ki Oldham Leaf Turtle (Lakang), u Assamese Macaque (Chrieh), u Monitor Lizard (Tyrpid) wa kiwi kiwi.
Ya ki artylli ki Slow Loris da wan li booh da ki bru na ka chnong Mowkaiaw. Kini ki Slow Loris toh ka bei wa i khon.
Na ka chnong Mulain won da pyllait ya uwi u chrieh Assamese Macaque uwa ri u bru ha yung.
Na ki thaiñ Mukhla-Moopyllait Syiar da pyllait ya le tylli ki Lakang wa ri ki bru wa ong ki wa chem ki na ki hali ki lyngkha ki.
Ha ka chnong Shnongpdeng won da pyllait ya ki wa boon tylli ki Rose Ring Parakeet (Lato) wa ri ki bru ha yung yong ki. Ya kini ki sim da pyllait cha ka khloo wa em cha jan ka chnong.
Ya kiwi tawan ki mrad da pyllait cha ki khloo Narpuh.
Katkam ka aiñ Wildlife Protection Act 1972, u ri, u kem, u psan, u dai wei wow tynyap ya ki mrad khloo toh man i pyrchah ya ka aiñ wei ya kiwa chem wa leh ya kini waroh i pynchitom toh u kset patok 3 snem deilang ka kuna wa T. 10,000.
Ka DFO da pyntip ko leh wa i ri ya ki mrad khloo booh ko leh ya i ma ya ki paidbah kamwa jia ha chnong Shangpung ha u snem wa da dep heiwa da em uwi u chrieh wa lait na i thaw ri ya oo wei da sdang u phrat ya ki khynnah kani ka chnong wei u tre yong oo toh uwa lai khih cha kiwi ki chnong kamtæ ym em wa chare ya uni u chrieh.
Da poi ka ujor pyrchah ya uni u chrieh cha u DC wei hadien wa wan yung u tre uni u chrieh da yoh u kem ka tnat Forest ya u chrieh.
Discussion about this post