Ka Sikkim u sdang noh ko wow wai yaka jylla cha kiwa uiñke suwari nadooh ka 10 tarik u Naichiphaw, 2020 deiwa da chah wow wai biang ki Hotel, ki Homestay wa kiwi ki kaam wa yatoh waka Tourism.
Ka sorkar Sikkim leh da rai ko wow wai ya u pood yong ka waka West Bengal dei wym khang namo booh kyndon yei lai i wan ki kari nadooh ka 1 Naichiphaw, 2020.
Yaki Hotel da ye wow Book nadooh ka 27 tarik uni u bnai, heiwa ka 27 tarik leh da man ko ka sngi wa khaddooh wa da pynkrehkaam yaka Lockdown haka Gangtok Municipal Corporation Area wei da pyndam leh yaki kyndon Odd/Even Number i pynlai yaki kari kamai nadooh ka 1 Naichiphaw.
Ka Sikkim u pdiang ko leh ya kiwa wan na baar ri kiwa em yaki VISA wa biang wei daw e leh yaki yaka Inner Line Permit nadooh ka 10 tarik u Naichiphaw.
Kini waroh u krehkaam ki deiwa bood thij yaki kyndon SOP wa da booh.
Ki kaam wa yatoh waka uiñke suwari toh kawa yarap poisa bha yaka Sikkim deiwa em kiwa boon ki thaw wa ka-it ki bru wow lai kam ka Tsomgo Lake, Nathula Pass, Yuksom, Lachung, Lachen, Yumthang Valley, Ravangla, Pelling, Zuluk wa Namchi.
Ka Sikkim kattæ da em ko 2833 ngut kiwa da dep yoh COVID-19 heiwa kiwa chait da em ki 2097 ngut wei da em leh 31 ngut kiwa da dep yap, da man ko leh kawa duna dooh ka jylla wa yoh ya uni u khñiang hadien ka Mizoram kawa em kiwa duna dooh kiwa yoh.
