Ka yalehbol daw yoh ko yei burom wow wai ya ka 2nd North East Olympic Games 2022, heiwa ki liang ki jylla ka thaaiñ mihsngi chynrang wa kynthai daw yakhun ki yei naam jop.
Ka NEOG 2022 daw wai pyrda ya ka ha ka 10 tarik uni u bnai tangwa deiwa pyrkhat wa emkaam ya ki sngi chongngiah ya kiwa yalehke, kamtæ ki yalehbol u sdang noh ki ha ka 7 tarik.
Ya ka madan yalehke ka MFA kawa man ka Third Ground, Polo da chna ya ki thaw paitke wa chipor wei da rah leh ya ki 6 tylli ki Floodlights naka SSA Stadium First Ground cha kani ka madan ka MFA yow ye u pteiñ rap slem ya ki yalehke neidaw wa smat doom ki sngi ha kini ki por tlang. Ya ki thaw kylliang sula kiwa yalehke leh da dep wow chna pynmiat deiwa kyrchaan ka sorkar jylla.
Ki kyrdan yalehbol toh kiwa da yahbah ha ki ar bynta, ka U-21 Men waka U-17 Women.
Ha ki chynrang daw chimbynta ka Manipur, Mizoram, Tripura wa Assam kiwa da em hapoh ka Group 1 katwa ka Meghalaya, Nagaland, Arunachal Pradesh wa Sikkim da em ki ha ka Group 2.
Ka Meghalaya da em biang ko ha ka Group 2 yong ki kynthai deilang waka Mizoram, Arunachal Pradesh wa Sikkim katwa ha ka Group 1 da em ka Manipur, Assam, Tripura wa Nagaland.
Neiliang u Coach ki chynrang ka Meghalaya, u Khlain Pyrkhat Syiemlieh da yooluti u wa waroh ki jylla daw sai lut ki yei sap ki khamtam ka Mizoram wa Manipur.
“Ym ye wow kheiñstiñ leh ya ka Nagaland kawa dang dep jop ya ka U-17 Boys Subroto Cup ini wa dep wei kini kiwa yalehke ye ki wow em ha ka U-21,” da ong u Syiemlieh.
Haka 1st NEOG wa pynman ha Manipur ha u 2018, ka Meghalaya da yoh takma tama ko ha ki chynrang katwa ki kynthai da yoh ki hei wa soo, da yooluti wa deiwa pynbood ya ki thaw paitke daw yoh mynsien kiwa yalehke ka jylla wow lehbha ha kani ka kynti.
