Pammanik : Ka Prosechon Yukharist ka Parish St. Claret Mooksiang (Phramer) West Jaiñtia Hills kawa da man ha ka chnong Pammanik ha kani ka 12 tarik uni u bnai, da man ko kawa phooh wa pheiñ heiwa da ki hajar ngut ki para wa ngait ka niam na ki Parish waphær waphær yong ka Jowai Diocese wa na kiwi da tooid ki wow chim bynta ha kani ka Prosechon kawa emlang u Lyngdohsad ka Jowai Diocese Most. Rev. Bishop Victor Lyngdoh uwa man leh u kongsan ha waroh ki lehniam.
U Bishop Victor Lyngdoh hei klam sneiñ klam kroo yong oo ha i por Mass, da ong u wa ka chongkha chongman toh iwa sdang wow saiñdur ya ka manyung mansem wei i bha namo iwa sih da thung symbe na yung.
Ka manyung man ko kawa da saiñdur da u Blai neitæ i daw man ko leh kam ka thaw mane blai wa khian kamtæ ki manyung toh kiwa thung symbe wa poor cha ka imlang sahlang, ka burom akor, hadooh kiwa boon iwa bha hadooh iwa sih leh kamjooh.
Da ong chooh chooh u wa hei man bru ym lait ki na kiwa boon ki eh ki khoo nadooh i dooh i duk, kiwa pynwit ha kiwa boon ki rukom tangwa ym hoi u dooh yei ngait yong i ha u Blai.
Heipor nohchariñ ka sngi da pynman ya ka lai prosechon Yukharist kawa tbian na Madanbol yong ka chnong wei da lai na u sarok chnong yong ka Pammanik wei da pynkut biang ha ka jooh ka madan. Ha chwa wow pynkut wei u yoh ya ka kyrkhu na u Bishop da ka Sakrament wakhooid tam ka duwan, da yoh ya i klam sneiñ kyntu kawa sñiawsuk chaphang i kordor i man kynja mynsien da iwa e nongmuna deiwa ngam yillu pyrkhat da u Rev. Fr. Manbha Pakem.
Da ong u wa emkaam u yaroh ya kiwa ngait Niamtre, kiwa ngait ka Balang Church of North India (CNI) wa kiwi de ki jait niam kiwa em hapoh ka chnong kiwa krehlang wa kiwa ngait niam Balang Katholik yow pynman ya ka yaseiñ prosechon Yukharist wa jop kam ka wi ka balang.
Discussion about this post