Shillong: Ka sorkar jylla ynne ka sngi da rai ko wow su bai nongsngi cha waroh kiwa mylla kiwa da dooh wow lai mylla na i khang chnong ha i dor T. 700 chi tayaw wei i su u man ko neibynta le tayaw itæ nadooh ka 23 tarik u Wisu (Mar) hadooh ka 14 tarik uni u bnai April iwa poi T. 2100.
Hawa klam hadien ka yalang ka kynhun ki montri ynne ka sngi, u Symbood Montri Rangbah ka jylla, u Prestone Tynsong da pyntip u wa ka sorkar da mynjur ko ya kani ka rai hadien wa da yoh ya i tyrwa na ka chnat Labour, neibhah em ym duna ya ka 1.20 Lak ngut kiwa mylla kiwa da chah ktah na i khang chnong wa 21 sngi.
Ha iwi i liang, u Prestone da pyntip u wa ka kynhun montri da rai ko leh wow su cha waroh ki khynroo khyllood wa lai puræ wa kiwa chong chnong kiwa dang sahkut cha baar jylla kiwa da Register wa ka sorkar wow su T. 3000 chisien su yow yarap neibynta i emkaam yong ki.
U Prestone da ong u kani ka rai ka sorkar toh neidaw wa ym duna ya ka 3000 ngut kiwa chong chnong kiwa dang sahkut cha baar wei ka sorkar da kyntu ko ya kini waroh wow chong bait ha ki thaw wa em ki katwa dang lai i khnang ha waroh kawi ka ri.
Discussion about this post