Shillong: U montri ka chnat i chaitni khiah ka jylla, u Alexander Laloo Hek ynne da ong u wa ka sorkar daw su ko T. 2000 chi bnai ya ki 6678 ngut ki ASHA ha kani ka yakhun ya ka khlam u COVID-19.
Da ong chooh chooh u wa kakam wa man daw su sa kamwa T. 1000 chi bnai cha ki ASHA weiwa da mynjur da wow su kam ka Incentive cha ki ASHA yei kreh ki heiyatoh wa u COVID-19 nadooh u Duyatra (January) 2020 hadooh u Naiynru (June) 2020 wei yeini da jubab u Hek yeiwa kylli u MLA ka Congress, u Mayralborn Syiem ynne ka sngi.
U Hek da pyntip wa ka poisa hadooh T. 10,14,67,000 da pynlait cha ki District ha ka 5 tarik uni u bnai wei kani kynthup ko leh ya ka poisa wa dang sah wa toh u su ya ki ASHA hapoh ka National Health Mission.
Chooh chooh u Hek da pyntip u wa i su da ki District Health Societies dang pteiñ i neibynta kiwa dang sah nadooh wa sdang ka Scheme hadooh u Wisu (March) 2018 wei ka poisa kawa dang em ha ki Societies em ko T. 5,12, 73,601 hadooh ka 31 Wisu 2020.
Da ong u leh wa kini ki yukheiñ ymye u man ki thij kat wympu pyndep ya ka Audit.
U Hek da pyntip u leh wa heiyatoh wa ka khlam u COVID-19 ki ASHA ha East Khasi Hills da yoh ki ya ki 3 Ply Mask, ki Mask that wa ye biang u pynemkaam, ki Hand Wash, Hand Sanitizers, Sap-kti, ki PPE wa kiwi kiwi.
Da ong u wa ka chnat da e ko hadooh 500 tylli ki Raincoat ha ka 12 tarik uni u bnai cha ki ASHA ha East Khasi Hills District kiwa emkaam u kreh ha ki Containment Zones.
Hawa wanrah ya kani ka phang ha ka bynta wa kongsan namo ka Call Attention, u Syiem da kyntu u ya ka sorkar wow pynku ya ka poisa wa toh u su cha ki ASHA cha ka T. 2000-3000 chi bnai na ka T. 1000 khamtam heiyatoh wa ki kreh neibynta ka khlam u COVID-19.
Da ong u wa hanlada ym tikna i rukom su tulop ya ki tangwa ki pteiñ ki wow kreh khlem chong khamtam ha i yakhun ya ka khlam u COVID-19.
Discussion about this post