Ka Hynniewtrep Youths’ Council seiñbei deilang waka HYC West Khasi Hills District da hiar ki cha Langpih yow pynman yalang ha pchem ka skur ka Raid Mynsaw Secondary School Langpih, kawa da seiñ ha u snem 2017 kawa hadooh katni dang yoh yei kyrchaan du yaka UP School.
Yaka yalang da pynlai da u Chairman ka Managing Committee ka skur u Hindro Samakha wei da yoh yei klam nyngkong na u Lumlang Kharsyiemlieh President, HYC West Khasi Hills District, uwa da e khublei kyrpang ya kiwa sikai yei krehchitom ki wot hapyrdi i eh ha kini ki thaw wei da toor ki chakhmat dei maya yaka jaitbru, deiwa ong leh wa ha ki thaw khappood emkaam i yaka stat ka tip khnang wow ye u yaleh da i stat kamtæ da kyntu u ya ki khynnah skur wow man kiwa minot.
U Robertjune Kharjahrin da ong u wa kamwa u Thomas Jones da wan u da ki hajar Mile wow e yei pynche, ileh won para Khasi ym ye i wow yarap lang yaki paradoh parasnam wa em ha ki thaw khappood.
Da ong u leh wa neiliang ka seiñ ym ye ko du wow ap yeiwa emkaam ka jaitbru, kamtæ da wan ha kani ka thaw yow kyrchaan ya uwi uwa sikai ka School Managing Committee, yow lai ka skur chakhmat wei daw su ka HYC seiñbei man u bnai. Wei da pynbna u leh wa daw yarap chi lak tyngka man u snem neibynta uwi uwa sikai deiwa yarap poisa ki chipai ka HYC.
Ha i jooh i por da kyntu u yaka thaaiñ wym toh u piah u pra ki wei toh u man ki kiwa yatylli, deiwa ong lada ka thaaiñ Langpih jæd ko, ka KHADC toh wow bahkhlieh ya ini.
Ha katai ka sngi da emlang u Distarborlin Wanniang President, HYC Rimulliang Circle, Chester Kharbani, President HYC Nongstoin Circle wa u Wanteibok, General Secretary HYC WKHD.
Discussion about this post