Jowai : “U synchaar salonsar O ya ka Elaka da ki aiñ tip-bru tip-blai” da ong u Puramon Kynjing, hei klam kyntu yong oo ha ka yalang election kawa khadooh neibynta u jied ya u Pa Dolloi yong ka Elaka Jowai.
Kani ka yalap election neibynta u jied dolloi yong ka Elaka Jowai ynnin ka miet da poi ko cha wa kut, heiwa da yoh u sakhi yeini ha ka yalang paidbah yong uwi na ki kyrtong u Puramon Kynjing ha Loompyrdi, Mihmyntdu.
Kam u kyrtong hei klam yong oo, u Puramon da pynlung mynsien u ya ki paidbah deiwa ong “Lada em wa beiñ wa kynnoh ya nga, nga man O u bru u wym ksoh, neibhah wa hawa em wa kynnoh pynyoo wa nga ym biang O, katwa kamtæ emkaam wow pynbait wow pynyoo wow kdaw luti phi ya nga”.
Da ong u leh wa oo u e u yei bichaar iwa salonsar dei mynsien wa maya ya waroh ki khon ka elaka kamjooh ki baar elaka khlem wyrchaw ya ka niam ka rukom, chynrang næ kynthai, wa yoh namo wa dooh.
“Lada chah jied O, nga u e O i jooh i chakri ya kiwa jied ya nga namo ya kiwa ym em u jied ya nga” wei da pynkut u deiwa ong “lada em ki wym ye u jied ya nga, u sñiawbha ki u e i ngooh i dem i duwai i phirat neibynta ka synchaar ka khadar, wow ku wow roi ka elaka”.
Ha kani ka yalang paidbah da yoh leh yei klam i kape na kiwa boon ki waheh kam na u Obul Phawa uwa man u Assistant Waheh Chnong ka Mihmyntdu uwa da ong wa da boonsien wa yachem kaam u wa u Puramon Kynjing heiwa da chem u wa man sakhiat u, u bru uwa khooid uwa kreh yei kaam yong oo kam u Acting Dolloi.
U Chanbor Phawa, na Pamrapaithlu, East Jaiñtia da kyntu u ya ki paidbah wa emkaam u sñiawthooh ki wa ha kani ka kaam toh u pait ya u bru uwa biang, wei ymtoh u man ko ka kaam khynnah donhi.
“E wow man u snem 2017 wow sah kynmoo neibhah wow jied i ya u bru wow ksoh yei kaam Pa Dolloi yong i wei utæ u bru toh u Puramon neibhah man u, u bru u wym pait chilliang khmat ya kiwa yoh na kiwa dooh” da ong u Romi Dkhar, na Wapung Chnong.
U Stop Phawa, uwa man leh u Waheh Chnong ka Chamcham, East Jaiñtia da ong u wa emkaam u jied i ya Puramon wow man kam u Dolloi neibhah deiwa jied ya oo, ka elaka waroh kawi ym silet de ko ha ka mynried.
Katwa u Waheh Chnong ka Mustem u D. Nongpluh da ong u wa ki paidbah na ka chnong da rai ki wa hadien wa da pynsñiaw ki pynar ngut ki kyrtong da chem ki wa u Puramon Kynjing man u uwa biang liang wanang.
Heijooh i por da ong u wa uni u kyrtong heipor wa ksoh u kam u Acting Dolloi da boon ki kaam kiwa da leh u kam wow thung ya ka Dorbar Elaka kamjooh leh ya ka yungbichaar ka elaka (Village Court) wow kreh neibynta ki khon ka elaka.
Ha kani ka yalang da yoh leh yei klam na ki waheh chnong kamjooh na kiwi kiwi na kylleiñ ka elaka.
(Sponsored Content)
Discussion about this post