U Montri Rangbah ka jylla, u Conrad Sangma ynne hapoh ka yung dorbar da pynbna u wa ka sorkar hei sien wa nyngkong da wanrah ko ya ka Market Intervention Scheme for Non-Perishable Product namo ki mar wym pyut deiwa sdang ya u saroo wa u kwai deiwa pynche wa kani ymtoh ka Minimum Support Price deiwa booh yei dor ki mar.
Kani ka Scheme toh yow thied da ka sorkar ya ki mar na ki warep ha i dor wa da booh yow ye u pynlai yaaw ya ki mar heiwa ka sorkar u thied ko leh hei dor wa syad yow ye leh u pynku dor ya kini ki mar.
Ka sorkar da booh bhah ko ka poisa Rs. 100 klur wow leh yeini yow thied ya ki mar kut wa hiar dor ki mar.
Da e nongmuna u wa katkam ka Report wa da yoh u, i dor u saroo wa dadep thaad sngi toh Rs. 35 chi kilo wei katkam i dor wa booh ka TRIFED (Tribal Cooperative Marketing Development Federation of India) toh u man ko Rs.50. Kamtæ ka sorkar u pynku ko da 10% yei dor wa da booh ka TRIFED iwa mut Rs. 55 manda thied da ka sorkar na ki warep.
Ka sorkar da booh ko wow thied 800 Kg na uwi u warep wei waroh da booh thong 1000 ngut ki warep.
Wei neidaw wa dang sdang thymme dang hapoh chi bnai ya kani, da ye wow Register dang du 183 ngut ki warep, da pyntip u Conrad.
Heiyatoh wa u kwai won, da pyntip u wa i dor kattæ toh Rs. 87.50 tangwa katkam i dor ka TRIFED toh u man u Rs. 100 wei heini ka sorkar u pyntam biang ko da 10% wei u pynbna yei dor wa Rs. 110 wei daw thied kwai na 10,000 ngut ki warep.
Kamtæ da ong u wa ini waroh daw yarap ko ya ki warep yow lait ki wow dooh nong wei ha uni u snem da booh thong wow yarap ya 22,000 ngut ki warep wei daw pynku chooh chooh ha ki snem wow wan wei yeini u leh du ha ki por wa hiar dor donhi.
Discussion about this post